BUU ókili qazaqtar týraly: Astanaǵa túsken boıda qonaqqa shaqyryp, shańyraq kórsetti

ASTANA. QazAqparat - Álemdik jáne dástúrli dinder lıderleriniń sezi Hatshylyǵynyń kezekti otyrysy BUU ókili Hanıfa Mezýı qazaqtyń qonaqjaılyǵyna rıza bolǵanyn jetkizdi. H.Mezýı BUU-da Órkenıetter alıansynyń gýmanıtarlyq jáne azamattyq qoǵamdy damytý máseleleri jónindegi aǵa qeńesshisi qyzmetin atqaryp júr, dep habarlaıdy QazAqparat tilshisi.

«Men Qazaqstan jastaryna úlken sálem joldaıyn dep edim. Shynymdy aıtsam, osy jerdegi jastardyń tárbıesine óte rıza boldym. Máselen, keshe Astanaǵa kelgen boıda stýdent qyzdarymnyń bireýi meni birden óz úıine qonaqqa shaqyrdy. Anasynyń áńgimesin tyńdadym. Osy jerdiń qonaqjaılyǵyna tańqaldym. Astanaǵa kelgenime bir saǵat ta bolǵan joq, meni birden úıge shaqyrdy, shańyraqty kórsetti. Sol úıde qazaqstandyq jastarmen jaqyn tanystym. Olar kóp nársege qyzyǵady eken. Bárin surap shyqty. Birikken Ulttar Uıymynda din máselesi qalaı qaralady? Bárin bilgisi keledi. Sosyn osy jerdiń jastary seni tyńdap qana qoımaı, óz oılaryn da jetkize biledi», - deıdi H.Mezýı.

Onyń aıtýynsha, búginde Birikken Ulttar Uıymynda dinaralyq kelisim máselesine basa nazar aýdarylady. Jaqynda QR Parlamenti Senatynyń tóraǵasy Qasym-Jomart Toqaev BUU-da bolyp, Álemdik jáne dástúrli dinder lıderleriniń sezin tanystarǵan bolatyn.

«Osynyń arqasynda Qazaqstannyń bastamalaryn halyqaralyq dárejede tanytýǵa bolady», - dep atap kórsetti H.Mezýı.

Aıta keteıik, 10-11 qazan aralyǵynda Astanada Álemdik jáne dástúrli dinder lıderleriniń kezekti VI sezi ótedi. Sezdiń ashylýyna Serbııa prezıdenti Aleksandr Výchıch pen EQYU Bas hatshysy Tomas Gremınger qatysady.

Otyrysqa Memleket basshysy Nursultan Nazarbaev tóraǵalyq etedi.