BUU ókili Qazaqstanda balalar quqyǵy jónindegi biryńǵaı organ qurýdy usyndy

ASTANA. QazAqparat – Ortalyq kommýnıkatsııalar qyzmetindegi brıfıngide Birkken Ulttar Uıymyna qarasty Balalar qorynyń Qazaqstandaǵy ókili Artýr Van Dızen balalardy qorǵaý jónindegi qyzmetti damytý boıynsha birqatar usynys aıtty, dep habarlaıdy QazAqparat tilshisi.

«Biz usynǵymyz keletin balalarǵa qyzmet kórsetý tájirıbesi Іshki ister mınıstrligi úshin erekshe bolýy múmkin. Máselen, túrli qylmystardyń qurbany bolǵan balalardan jaýap alý protsesi búldirshin úshin psıhologııalyq soqqy bolýy múmkin. Danııa, Islandııa jáne Shvetsııa sııaqty skandınavııa elderiniń bul baǵytta óte jaqsy tájirıbesi bar. Biz «Barnahýs» dep atalatyn model týraly aıtyp otyrmyz. Onda bir bilikti ári kásibı maman balaǵa saýalnama júrgizedi, al keıin barlyǵy sol beınejazbany kórip, odan aqparat alady. Osylaısha, bala qoryqpaıdy jáne kúızeliske túspeıdi», - dedi Artýr Van Dızen OKQ-daǵy brıfıngide.

Onyń aıtýynsha, kásibı maman júrgizgen saýalnama negizinde alynǵan málimet onyń máselesin sheshý men túrli qyzmet kórsetý úshin qoldanylady.

«Vedomstvoaralyq jáne sektoraralyq jumysty júıeli úılestirý óte mańyzdy. Bul rette qaı mınıstrlik qandaı máselege jaýap beretinin bilý qajet. Meniń oıymsha, Qazaqstanda balalar quqyǵyn qorǵaýǵa jaýapty bir organ qurý qajet. Mundaı organ mınıstrliktiń ishinde jumys isteıtin bolsa, ol tek osy bólimniń ishindegi jumysty ǵana úılestiredi. Al basqa mınıstrlikter óz ókilettikteri sheńberinde jumys isteı beredi. Sondyqtan biryńǵaı ortalyq organ qurylsa, onyń jumys nátıjesi áldeqaıda sapaly bolar edi», - dep usynys bildirdi ol.