BUU ókili qazaq dıplomattarynyń kásibıligine tánti boldy
«Qazaqstannyń dıplomatııalyq qyzmetine baǵa bere ketsem deımin. Qaýipsizdik keńesine qatysqan tájirıbeme súıene otyryp, qazaqstandyq dıplomatııa ózinniń kásibı deńgeıiniń joǵary ekendigin kórsetti jáne kórsetip te kele jatqanyn basa aıtqym keledi. Osy turǵyda Qaýipsizdik keńesiniń músheleri men BUU Bas assambleıasy bul jumystardy joǵary baǵalaıdy dep oılaımyn. Qazaqstanǵa aldaǵy ýaqytta da óz jumystaryn osyndaı konstrýktıvti, kásibı rýhta jalǵastyra berýine tilektespin», - dedi Mıroslav Encha.
Sonymen qatar BUU ókili Qazaqstannyń BUU Qaýipsizdik keńesine tóraǵalyǵyna qatysty pikirin bildirdi.
«Osy aıda Qazaqstan BUU Qaýipsizdik keńesine tóraǵalyq etedi. Bul aıryqsha mańyzdy ról. Óıtkeni Qazaqstan Qaýipsizdik keńesiniń tóraǵasy retinde onyń otyrysyn shaqyryp, kún tártibin uıymdastyrady jáne Qaýipsizdik keńesi atynan sóz sóıleıdi. Kelesi aptada Qaýipsizdik keńesiniń birneshe óte mańyzdy otyrysy bolady. Birinshisi - Prezıdent Nursultan Nazarbaevtyń qatysýymen ıadrolyq qarýsyzdaný, senim sharalary máselelerine arnalǵan otyrys. 19 qańtar, juma kúni Ortalyq Azııa men Aýǵanstan máselelerine arnalǵan otyrys ótedi», - dedi Mıroslav Encha.
Aıta keteıik, 2018 jyldyń 16-18 qańtary aralyǵynda Nursultan Nazarbaev Amerıka Qurama Shtattaryna resmı saparmen barady. Sapar barysynda AQSh Prezıdenti Donald Tramppen, sondaı-aq AQSh-tyń resmı jáne isker toptar ókilderimen kezdesýler josparlanyp otyr. Prezıdent sondaı-aq BUU Qaýipsizdik Keńesiniń otyrysyna qatysady.