BUU-nyń bıýdjeti 285 mıllıon dollarǵa qysqardy

ASTANA. QazAqparat - Birikken Ulttar Uıymynyń bıýdjeti buǵan deıingi ekijyldyq kórsetkishpen salystyrǵanda, 285 mıllıon dollarǵa qysqartyldy, dep habarlaıdy «QazAqparat» HAA Uıymnyń jańalyqtar ortalyǵyna silteme jasap.

Bas Assambleıanyń músheleri bul sheshimdi biraýyzdan qabyldaǵan. Aldaǵy eki jylǵa arnap múshe memleketter uıymǵa 5,4 mlrd dollar bólgen. Bul uıymnyń Bas hatshysy Antonıo Gýterrısh suraǵan somadan azdaý.

AQSh elshisi Nıkkı Heılıdiń aıtýynsha, uıym bıýdjetiniń qysqartylýyna Amerıka delegatsııasynyń yqpaly bolǵan.

«Bul BUU jumysynyń tıimdiligi men eseptiligin arttyrýǵa baǵyttalǵan tarıhı mańyzy bar qadam bolmaq. Jańa bıýdjet jónindegi kelissózderdiń nátıjelerine bizdiń kóńilimiz tolady. Aıta keteıin, biz BUU tıimdiligin arttyrý jáne óz múddelerimizdi qorǵaý múmkindikterin izdeýdi jalǵastyramyz», - dep málimdedi turaqty ýákil.

Eske sala ketsek, Bas hatshy usynǵan jańa bıýdjettiń jobasynda shyǵyndardy 200 mln dollarǵa qysqartý kózdelgen bolatyn.