BUU-nyń adam quqyqtary jónindegi keńesi Qurandy órteý áreketin aıyptady

ASTANA. QazAqparat – BUU-nyń adam quqyqtary jónindegi keńesi batys elderiniń narazylyq tanytýyna qaramastan Qurandy órteý áreketin aıyptady, dep habarlaıdy QazAqparat Túrkııanyń Anadoly agenttigine silteme jasap.

Jenevada Islam yntymaqtastyq uıymynyń bastamasymen ótken BUU-nyń adam quqyqtary jónindegi keńesiniń arnaýly 53-sessııasynda Qurandy qorlaý áreketterin aıyptaý qararynyń jobasy talqylandy. Daýys berýge 47 el qatysty.

Qujattyń qabyldanýyna 28 el daýys berse, 12 el qarsy boldy, al 7 memleket qalys qaldy.

Aljır, Argentına, Bangladesh, Bolıvııa, Kamerýn, Qytaı, Kot-d’Ivýar, Kýba, Erıtreıa, Gabon, Gambııa, Úndistan, Qazaqstan, Qyrǵyzstan, Malavı, Malaızııa, Maldıv, Marokko, Pákistan, Qatar, Senegal, Somalı, OAR, Sýdan, Ýkraına, Birikkken Arab Ámirlikteri, Ózbekstan jáne Vetnam qarardyń qabyldanýyn jaqtap daýys berdi.

Belgııa, Kosta-Rıka, Chehııa, Fınlıandııa, Frantsııa, Germanııa, Lıtva, Lıýksembýrg, Chernogorııa, Rýmynııa, Ulybrıtanııa jáne AQSh qarsylyq tanytty.

Paragvaı, Nepal, Meksıka, Gondýras, Grýzııa, Benın jáne Chılı qalys qaldy.

Túrkııanyń daýys berýge quqyǵy joq. Sebebi onyń BUU adam quqyqtary jónindegi keńesiniń baıqaýshysy mártebesi bar.