BUU-nyń 165 memleketi QR Prezıdentiniń adam quqyqtary jónindegi sharalar týraly sheshimimen tanysty

JENEVA. QazAqparat - 10 maýsymda Qazaqstannyń Turaqty ókili Janar Aıtjanova BUU Adam quqyqtary jónindegi Joǵarǵy komıssarynyń jyl saıynǵy baıandamasyn talqylaýǵa qatysty. Bul týraly QR Syrtqy ister mınıstrliginen málim etti, dep habarlaıdy QazAqparat.

Ol Joǵarǵy komıssar Mıshel Bacheletke jáne BUU-nyń 165 múshe memleketiniń delegatsııalaryna arnalǵan sóz sóıleýinde 2021 jylǵy 9 maýsymda Qazaqstan Respýblıkasynyń Prezıdenti qol qoıǵan «Qazaqstan Respýblıkasynyń adam quqyqtary salasyndaǵy odan ári sharalary týraly» Jarlyq jóninde habarlady.

«Dıplomat Prezıdent Jarlyǵyna sáıkes Úkimet jyl saıyn BUU sharttyq organdarymen jáne BUU-nyń Adam quqyqtary boıynsha keńesiniń arnaýly rásimderimen ózara is-qımyl tetikterin jetildirý, áıelderge qatysty kemsitýdi joıý, pikir bildirý bostandyǵyna quqyq, úkimettik emes uıymdarmen ózara is-qımyl tıimdiligin arttyrý sııaqty jumys baǵyttaryn kózdeıtin adam quqyqtary salasyndaǵy birinshi kezektegi sharalar josparyn iske asyrý týraly esep beretindigin jóninde málimdedi», - dedi SІM-nen.

Sonymen qatar, J. Aıtjanova Joǵarǵy komıssar M. Bachelettiń baıandamasynda kózdelgen adam quqyqtary salasyndaǵy Qazaqstannyń zańnamasyna engizilgen ózgeristerdi atap ótip, kezdesýge qatysýshylardy COVID-19 pandemııasyna baılanysty qıyndyqtarǵa qaramastan, 2020 jyly Qazaqstanda adam quqyqtaryn kótermeleý jáne qorǵaý maqsatynda reformalar iske asyrylǵanyn habardar etti. Beıbit jınalystar týraly tujyrymdamalyq jańa zańdy qabyldaý atalǵan belgili qadamdardyń biri bolyp tabylady, ol habarlama sıpatyn, arnaıy aımaqtardy aıqyndaýdy jáne beıbit jınalystardy ótkizýdi retteýdi ońaılatýdy kózdeıdi.

«Qazaqstannyń Turaqty ókili Qazaqstan adam quqyqtary salasyndaǵy birinshi kezektegi sharalar josparyn ımplementatsııalaýdy ustanatyn bolatyndyǵyn málimdedi», - dedi syrtqysaıasat vedomstvosynan.