BUU: Myńdaǵan bala soǵys qımyldaryna qatysýda

NUR-SULTAN. QazAqparat – Sońǵy 20 jylda ásker jáne úkimettik emes qarýly kúshterden 170 myńnan astam bala bosatyldy, dep habarlaıdy QazAqparat BUU-nyń Jańalyqtar saıtyna silteme jasap.

Mundaı nátıjege Balalardyń janjaldarǵa qatysýyna baılanysty Balanyń quqyqtary týraly konventsııanyń fakýltatıvtik hattamasynyń kómegi zor boldy. Alaıda áli kúnge deıin kámelettik jasqa tolmaǵandar men jas balalar áskerge alynyp, barlaýshy jáne seksýaldy qul retinde paıdalanylyp keledi.

«172 memleket ratıfıkatsııalaǵan fakýltatıvtik hattama – soǵysta balalarǵa oryn joqtyǵy týraly jahandyq bátýalastyq. Bul elder 18 jasqa tolmaǵandardy áskerı áreketterge qatystyrmaýǵa ýáde bergen», - delingen Bas hatshynyń Balalar jáne qarýly qaqtyǵys jónindegi arnaıy ókili men Adam quqyqtary jónindegi komıtet músheleriniń baıandamasynda.
Alaıda balalar áli kúnge deıin soǵysqa qatysyp keledi. 2005 jyldan bastap balalar quqyqtarynyń buzylý faktileriniń úshten biri olardyń áskerge áketilýi men seksýaldy qul, jansyz jáne úı qyzmetshisi retinde paıdalanylýy bolyp otyr. 2005 jyldan bastan soǵys áreketterine 93 myń bala qatysqan.
«Búgin Fakýltatıvtik hattamanyń kúshine engenine 20 jyl tolyp otyr. Soǵan baılanysty osy qujatty qabyldamaǵan elderdi ony bekitýge, balalardy qarýly kúshterge tartýdy toqtatýǵa shaqyramyz. Sonymen qatar atalǵan áreketter úshin qylmystyq jaýapkershilik engizýdi usynamyz», - delingen hattamada. Onyń avtorlary hattamany bekitken elderdi ondaǵy mindetterdi oryndaýǵa shaqyrdy.