BUU mıssııasynda Qazaqstan bitimgerlerine tólenetin eńbekaqy mólsheri belgili boldy

ASTANA. QazAqparat - BUU mıssııasyndaǵy qazaqstandyq bitimgershi-jaýyngerler Lıvanǵa baǵyttalady. Bul týraly QR Qorǵanys mınıstrliginiń basshylyǵy málim etti, dep habarlaıdy QazAqparat.

«BUU bitimgerlik mıssııalary - ol áskerı baıqaýshylar men ofıtserler. Biz olardyń sanyn arttyryp, baǵyttaıtyn jerdiń geografııasyn keńeıtip jatyrmyz. Bul biz kóp jyldan beri daıyndap kele jatqan bitimgerlik baǵyt bolyp otyr. Áskerıler BUU standarttaryna sáıkes tıisti daıyndyqtan ótti», - dedi QR Qorǵanys mınıstri Sáken Jasuzaqov Parlament palatalarynyń birlesken otyrysynan keıin.

Osy oraıda mınıstr elimizdiń sarbazdary Úndistandaǵy BUU oqytý bóliminde daıarlyqtan ótkendigin naqtylady.

«Bizdiń bólimshe tolyqtaı daıyn, jeke quram irikteldi. Sonymen qatar qajetti materıaldyq-tehnıkalyq qamtamasyz etýge qatysty barlyq másele sheshildi. Sarbazdardy kúzde baǵyttaıtyn bolamyz», - dedi S. Jasuzaqov.

Óz kezeginde Qorǵanys mınıstriniń orynbasary Talǵat Muhtarov bizdiń áskerıler Lıvanǵa baratynyn jetkizdi. Bitimgerlik qyzmet týraly zańnamaǵa sáıkes, mıssııanyń árbir qatysýshysyna eńbekaqy úsh ese artyq kólemde tólenedi.

«Eger de kelisimsharttaǵy sarbaz bizde 100 myń teńge eńbekaqy alsa, olarǵa bitimgerlik mıssııada aı saıyn 300 myń teńge tólenedi. Oǵan qosymsha BUU-dan da tólemder qarastyrylǵan, shamamen aıyna 1 410 dollar bólinedi. Sondaı-aq táýliktik aqy eki dollarǵa jýyq somany quraıdy», - dedi T. Muhtarov.

Budan buryn habarlanǵandaı, Parlament Elbasynyń ofıtserlerdi BUU mıssııasyna jiberý týraly usynysyn qoldady. 

Budan bólek, Qazaqstan Lıvandaǵy bitimgershi-jaýyngerlerdiń sanyn 120 adamǵa deıin ulǵaıtatyn bolady.