BUU: Madagaskarǵa klımattyń ózgerýinen týyndaǵan ashtyq qaýpi tónip tur

NUR-SULTAN. QazAqparat – Dúnıejúzilik azyq-túlik baǵdarlamasynyń málimetinshe, Madagaskardyń ońtústiginde mıllıonnan astam adam klımattyń jahandyq ózgerýinen týyndaǵan álem tarıhyndaǵy alǵashqy ashtyq jaǵdaıynda tiri qalý úshin jantalasyp jatyr. Bul jaıynda BUU-nyń jańalyqtar ortalyǵy málim etti, dep habarlaıdy QazAqparat tilshisi.

Madagaskar kólemi jaǵynan álemdegi tórtinshi aral sanalady jáne ǵalamnyń basqa esh jerinde kezdespeıtin ósimdikteri men jan-janýarlary bar biregeı ekojúıege ıe. Aralda ádette qurǵaqshylyq mamyrdan bastap qazan aıyna deıin sozylady. Al qarashada jaýyn-shashyn bastalatyn. Biraq, klımattyń jahandyq ózgerýi jergilikti turǵyndardyń daǵdylanǵan tsıklin tolyqtaı buzdy.

«Árıne, jaýyn-shashyn aıtarlyqtaı azaıdy. Jańbyr bastalǵanda jergilikti turǵyndardyń úmiti oıanady. Biraq, artynan ol qysqa ǵana jaýyn bolyp shyǵyp, arty qaıtadan qurǵaqshylyqqa ulasady. Osylaı jylda jylǵa qaıtalanyp keledi. Sondyqtan adamdardyń azyq-túlik qoryn tolyqtyrýǵa eshteńesi joq», - dedi Dúnıejúzilik azyq-túlik baǵdarlamasynyń ókili Elıs Rahmýn.

Elıs Rahmýn taıaýda Madagaskardyń ońtústiginde bolǵan. Bul óńirdegi júzdegen myń jergilikti turǵynǵa BUU men onyń seriktesteri kómek kórsetip jatyr.

«Keıbir óńirlerinde turǵyndar áli de bolsa eginshilikpen aınalysa alady. Biraq, jyldan jylǵa qıyndap barady. Al keıbir óńirinde múldem eshteńe óspeıdi. Sondyqtan adamdar shegirtke, jemis-jıdek jáne kaktýs japyraǵymen kúneltýge májbúr. Kaktýs japyraǵy burynyraqta iri qara mal azyǵy retinde ǵana paıdalanylatyn. Adamdar ony esh ýaqytta jegen emes», - dedi ol.

Onyń atap ótýinshe, aral turǵyndaryna kómek kórsetilmese, onda taıaý jyldarda ashtyqqa ushyraǵandar sany geometrııalyq progrespen arta túsedi. Sondyqtan Dúnıejúzilik azyq-túlik baǵdarlamasy keler jyldyń sáýirine deıin Madagaskardyń mıllıon turǵynyna qoldaý kórsetpek. Sol úshin 70 mıllıon dollar jınaýǵa kirisip otyr.