BUU klımatologtarynyń úkimi: 2019 jyl eń ystyq jyldardyń biri boldy

NUR-SULTAN. QazAqparat –Meteobaqylaý júrgizile bastalǵan ýaqyttan beri 2019 jyl 2016 jyldan keıin eń ystyq bolǵan jyl retinde tanyldy. Bul týraly Birikken Ulttar Uıymy Dúnıejúzilik meteorologııalyq uıymnyń (DMU) resmı málimdemesine súıenip habarlady.

Ótken jyly aýa temperatýrasy 1850-1900 jyldarǵa qaraǵanda 1,1°C-qa joǵary boldy. Atmosferadaǵy parnıktik gazdardyń kontsentratsııasynyń rekordty kórsetkishi jaǵdaıynda bul úrdis jalǵasatyny kútiledi.

NASA-ny qosa alǵanda, bes derekkózdiń málimetterin taldaı kele, DMU sarapshylary sońǵy bes jylda jáne onjyldyqta ortasha aýa temperatýrasy rekordtyq deńgeıge jetkeni týraly tujyrymǵa keldi. Onymen qosa, 80-shi jyldardan bastap kelesi árbir onjyldyq onyń aldyńǵyǵa qaraǵanda jyly bolǵan.

«Indýstrııaǵa deıingi dáýirdiń aıaǵynan bastap jahandyq ortasha aýa temperatýrasy 1,1°C-qa kóterildi. Al muhıttyń jylynýy rekordtyq deńgeıge jetti. SO2 emıssııasynyń qazirgi artý qarqynynda ǵasyr sońynda temperatýra 3-5°C kóterilýi múmkin», - dep habarlady DMU Bas hatshysy Petterı Taalas.

Eske sala keteıik, Parıj klımattyq kelisiminde múshe memleketter aýa temperatýrasynyń kóterilýin 1,5°C deńgeıinde ustap turýǵa mindetteme aldy. Olaı bolmaǵan jaǵdaıda, ǵalymdar adamzat balasy apatty jaǵdaıǵa ushyrap, planetanyń kóptegen bóligi elsiz jerge aınalatynyn eskertedi.

«2020 jyl 2019 jyldan «estafetany» qabyldady jáne ol tótenshe aýa raıy qubylystarynan bastaldy. 2019 jyly Avstralııada buryn-sońdy bolmaǵan qurǵaq jáne ystyq aýa raıy tirkeldi. Bul, órtterdiń jappaı órshýine, adamdarǵa, janýarlarǵa, búkil ekojúıege jáne jalpy qorshaǵan ortaǵa apat ákeldi», - dedi Petterı Taalas.