BUU QK músheligine saılaý Qazaqstannyń álem aldyndaǵy bedeliniń artqanyn bildiredi - N. Nyǵmatýlın
«Qazaqstannyń BUU Qaýipsizdik Keńesiniń turaqty emes múshesi bolyp saılanýy - álemdik qaýymdastyq aldyndaǵy bizdiń elimizdiń bedeli men róliniń artyp otyrǵanyn bildiredi. Bul shyn máninde tarıhı aýqymdaǵy mańyzdy oqıǵa. Prezıdent N. Nazarbaevtyń basshylyǵyndaǵy Qazaqstan óziniń 25 jylynda osynaý álemdik yqpaldy uıymnyń qataryna endi ǵana qosylǵan jas memleketten, sol uıymnyń joǵary basshylyq organynyń jumysyna aralasa alatyn memelketke deıingi joldardy júrip ótti. Qazaqstandy BUU Qaýipsizdik Keńesiniń turaqty emes múshesi retinde saılaý týraly sheshim Memleket basshysynyń álemdik deńgeıdegi kóshbasshy ekenin moıyndaýdy jáne N.Nazarbaevtyń Táýelsizdiktiń alǵashqy kúninen beıbitshilikti qorǵaý, órkenıetter men mádenıetter arasyndaǵy dıalogty qamtamasyz etý, álem elderi men halyqtary arasyndaǵy senimdi nyǵaıtý baǵytynda júrgizip kele jatqan aýqymdy jumysynyń nátıjelerin bildiredi», - dedi N. Nyǵmatýlın.
Sonymen qatar, spıker sóz arasynda Parlamenttiń halyqarlyq qyzmetine de toqtalyp ótti. Onyń aıtýynsha, depýtattyq korpýstyń halyqaralyq qyzmeti birinshi sessııada parlamentaralyq yntymaqtastyqty nyǵaıtýǵa, parlamenttik dıplomatııa jáne Qazaqstannyń ǵalamdyq qaýipsizdikpen qamtamasyz etýdegi halyqaralyq bastamasynyń qozǵalysyn damytýǵa baǵyttaldy. Bul baǵyttaǵy qyzmet aldaǵy sessııalarda da belsendi túrde jalǵasady.