BUU QK músheleri Sırııa kelissózderinde Astana protsesin joǵary baǵalady

ASTANA. QazAqparat - Qazaqstan BUU Qaýipsizdik Keńesiniń Sırııaǵa transshekaralyq gýmanıtarlyq kómek kórsetýdi jalǵastyrý týraly qararyn qoldady. Bul týraly QR Syrtqy ister mınıstrliginiń baspasóz qyzmetinen málim boldy, dep habarlaıdy QazAqparat.

BUU Qaýipsizdik Keńesiniń músheleri Sırııadaǵy daǵdarysty retteýde halyqaralyq qoǵamdastyq pen BUU-nyń  kúsh-jigerin, onyń ishinde Astana protsesi aıasyndaǵy qadamdardy joǵary baǵalady. Qabyldanǵan qararda Astana formatyndaǵy kelissózder ustalǵan adamdardyń, ásirese áıelder men balalardyń tez arada bosatylýyna, sondaı-aq qaıtys bolǵandardyń máıitin tapsyrýǵa, joǵalǵan adamdardy anyqtaýǵa eleýli úles qosatyny atap ótilgen.

Qararǵa sáıkes, BUU Qaýipsizdik Keńesi BUU-nyń gýmanıtarlyq jasaqtary men onyń oryndaýshy seriktesteri úshin qaýipsiz ári kedergisiz qol jetimdilikti qamtamasyz etýdi talap etýde. Osy oraıda, barlyq suralǵan aýdandarǵa jáne halyqtyń barlyq toptaryna dári-dármekter men hırýrgııalyq jabdyqtardy turaqty jetkizýge tıisti jaǵdaıdy jasaý qajettigi eskerilgen.