BUU Qazaqstannyń tótenshe jaǵdaıdyń aldyn alý daıyndyǵyn joǵary baǵalady
Aımaqtyq forým aıasynda tabıǵı apattyń aldyn alý men ony boldyrmaýǵa daıyndyqty odan ári kúsheıtý maqsatyndaǵy yntymaqtastyq sharalaryn damytýǵa baǵyttalǵan máseleler talqylanyp, birqatar sheshimder qabyldandy.
Forýmǵa Qazaqstan, Qyrǵyzstan, Tájikstan, Túrikmenstan jáne Ózbekstan elderiniń tótenshe jaǵdaı vedomstvolarynyń basshylary men ókilderi qatysty. Sonymen qatar, forýmǵa apattyń aldyn alý jónindegi halyqaralyq jáne memlekettik emes uıym ókilderi de keldi.
«Qazaqstannyń osyndaı mańyzdy kezdesýdi uıymdastyryp otyrǵany qýantarlyq jaǵdaı. Ortalyq Azııa elderiniń tabıǵı apattardyń aldyn alýda múddeleri ortaq bolǵandyqtan, olardyń bir-birimen tájirıbe almasýy árbir qatysýshy el úshin tıimdi. Sebebi apattyń saldaryn joıýǵa jumsalatyn qarjyny oǵan daıyndyqty joǵary deńgeıde jasaý arqyly jeti ese azaıtýǵa bolady», - deıdi BUU Rezıdent-Koordınatory, BUU Damý baǵdarlamasynyń Qazaqstandaǵy turaqty ókili Norımasa Shımomýra.
Onyń aıtýynsha, Qazaqstannyń tótenshe jaǵdaıdyń aldyn alý men oǵan daıyndyq deńgeıi Ortalyq Azııa elderiniń ishinde jetekshi orynda. Sondyqtan, jańa bastamalardyń dál osy Qazaqstannan shyǵýy ádetki jaǵdaı.
«Apattyń aldyn alý nemese saldaryn joıý tek bir mınıstrlik nemese vedomstvonyń jetekshiligimen emes, eldiń barlyq úkimettik mekemeleriniń atsalysýymen júrgizilýi tıis. Olardyń árqaısysy apat kezinde óz kómegin berýge únemi daıyn bolýy kerek. Osy syndy máseleler búgingi forým barysynda qaraldy», - deıdi BUU Damý baǵdarlamasynyń Qazaqstandaǵy turaqty ókili.
Halyqaralyq forým qorytyndysy boıynsha, Tótenshe jaǵdaılar men tabıǵı apattardyń qaýip-qaterlerin azaıtý ortalyǵyna aımaqtyq forým sekretarıaty statýsy berildi.
Aıta ketsek, Tótenshe jaǵdaılar men tabıǵı apattardyń qaýip-qaterlerin azaıtý ortalyǵy Almaty qalasynda 2013 jyly mamyr aıynda Qazaqstan men Qyrǵyzstan arasynda ornatylǵan kelisim aıasynda boı kóterdi. Sodan beri ortalyq keńesine ózge de Ortalyq Azııa elderiniń tótenshe jaǵdaı vedomstvolary birikti.
Joldas Órisbaev