BUU Qazaqstannyń tsıfrlyq úkimetiniń damýyna joǵary baǵa berdi
«Bıyl 28 qyrkúıekte BUU Bas Assambleıasynda elektrondy úkimetti damytý ındeksi boıynsha 2022 jyldyń qorytyndysy jarııalandy. Júrgizilgen reıtıngke sáıkes álem elderinde tsıfrly jáne elektrondy úkimet qyzmeti salasynda ilgerileý bar. Oń ózgeris Qazaqstanǵa da qatysty. Qazaqstan ındekstiń tórt klasteri boıynsha eń joǵary pozıtsııada tur. Sonymen qatar elektrondy úkimetti damytýda kóshbasshy elderdiń biri. Qazaqstandy «very high» jáne «very, very high» deńgeıine jaqyn deýge bolady. Odan bólek, elektrondy úkimettiń onlaın servıs ındeksi boıynsha da sizdiń elińiz eń joǵary ball aldy. Qazaqstannyń onlaın qyzmetter servısin damytý ındeksi boıynsha úzdik tájirıbesi bar», - dedi Birikken Ulttar Uıymynyń tsıfrlyq úkimet, ekonomıkalyq jáne áleýmettik máseleler jónindegi departamentiniń basshysy Vınchentso Akvarıo elordada ótken jıynda.
Degenmen BUU ókiliniń aıtýynsha, atalǵan sala boıynsha damytýdy qajet etetin tustar da barshylyq.
«Qazaqstannyń úzdik elder qataryna qosylýyn tejeıtin jalǵyz nárse - telekommýnıkatsııa ınfraqurylymynyń kórsetkishteri», - deıdi ol.
Vedomstvo túsindirgendeı, telekommýnıkatsııa ınfraqurylymy keńjolaqty baılanysty bildiredi.
Sondaı-aq, tsıfrlyq damý mınıstrliginen BUU baǵalaýy - elektrondy úkimettiń damý ındeksi boıynsha júrgiziletin eń bedeldi reıtıng ekendigi aıtyldy.
Reıtıng sheńberinde BUU-ǵa qatysýshy 193 el baǵalanady.