BUU Qazaqstannyń turmystyq zorlyq-zombylyq týraly jańa zańyna qoldaý bildirdi

<p>ASTANA. KAZINFORM &mdash;&nbsp; BUU Qazaqstannyń turmystyq zorlyq-zombylyq qurbandaryn qorǵaıtyn zań qabyldaǵanyn joǵary baǵalaıdy. &laquo;Bul genderlik zorlyq-zombylyqty joıý jolyndaǵy alǵa jasalǵan qadam&raquo;, - deıdi BUU-nyń Qazaqstandaǵy turaqty úılestirýshisi Mıhaela Frıberg-Storı. Bul týraly <a href="https://news.un.org/ru/story/2024/04/1451316" target="_blank" rel="noopener">BUU jańalyqtar ortalyǵy</a> habarlady.</p>

Búgin, 15 sáýirde Qazaqstan Prezıdenti Qasym-Jomart Toqaev áıelder quqyǵy men balalar qaýipsizdigin qamtamasyz etý týraly zańǵa qol qoıdy. Qujat «Qazaqstan Respýblıkasy Ákimshilik quqyq buzýshylyq týraly kodeksine áıelderdiń quqyqtary men balalardyń qaýipsizdigin qamtamasyz etý máseleleri boıynsha ózgerister men tolyqtyrýlar engizý týraly» dep atalady.

Zań boıynsha endi uryp-soǵý jáne densaýlyqqa qasaqana jeńil, ortasha jáne aýyr zııan keltirý úshin qylmystyq jaýapkershilik qarastyrylǵan. Eger zorlyq-zombylyq pen qorlaý kámeletke tolmaǵandarǵa baǵyttalǵan bolsa, onda taraptardyń tatýlasý múmkindigi joqqa shyǵarylady. Zańnyń qabyldanýyna burynǵy joǵary laýazymdy sheneýniktiń áıelin óltirdi degen boljamǵa qoǵamnyń reaktsııasy sebep bolǵan.

Mıkaela Frıberg-Storıdiń aıtýynsha, jańa zań genderlik zorlyq-zombylyqtyń barlyq túrin joıýǵa baǵyttalǵan mańyzdy qadamdy bildiredi. Bul zańnamalyq sheshim Qazaqstannyń adam quqyqtaryn, ásirese áıelderdi, balalardy jáne áleýmettik osal toptaryn turmystyq zorlyq-zombylyqtan qorǵaýǵa degen umtylysyn kórsetedi. 

Foto: BUU-nyń Qazaqstandaǵy turaqty úılestirýshisi

«Turmystyq zorlyq-zombylyq úshin qylmystyq jaýapkershilikti engizý arqyly Qazaqstan mundaı áreketke jol berilmeıtinin jáne kináliler zańǵa sáıkes jaýapkershilikke tartylatynyn túsindirdi», - dep atap ótti BUU Turaqty úılestirýshisi.

«Bul mańyzdy qadam genderlik teńdikti ilgeriletip qana qoımaıdy. Sonymen qatar turmystyq zorlyq-zombylyqtan zardap shekkenderdiń ómirin qalpyna keltirý úshin sot tóreligi men qoldaý qyzmetterine qol jetkizýin qamtamasyz etedi», - dedi ol.

Birikken Ulttar Uıymy Qazaqstandaǵy óziniń ókili arqyly eldi osy zańdy tıimdi júzege asyrý jáne oryndaýǵa, sonyń ishinde turmystyq zorlyq-zombylyq týraly habardarlyqty arttyrýǵa, quqyq qorǵaý jáne sot organdarynyń qyzmetkerlerin oqytýǵa jáne zorlyq-zombylyqtan zardap shekkenderge qoldaý kórsetý tetikterin qurýǵa shaqyrady.

«Bul keshendi tásil barlyq adamdar óz úıinde qorqynyshsyz jáne zorlyq-zombylyqsyz ómir súre alatyn qoǵam qurý úshin qajet», - dedi Frıberg-Storı.

Onyń aıtýynsha, BUU genderlik zorlyq-zombylyqty joıý jáne teńdik jáne qadir-qasıet mádenıetin ilgeriletý boıynsha Qazaqstanǵa qoldaý kórsetýge daıyn.