BUU qazaqstandyq áskerı tehnıkalardy bitimgerlik mıssııalarda qoldanatyn bolady

NUR-SULTAN. QazAqparat - QR Tsıfrlyq damý, qorǵanys jáne aeroǵarysh ónerkásibi mınıstri Asqar Jumaǵalıev elordada ótken BUU-nyń bitimgershilik úshin tehnologııalyq seriktestik jónindegi V halyqaralyq sımpozıýmy qatysýshylarymen kezdesti, dep habarlaıdy QazAqparat tilshisi.

«Qazaqstannyń BUU-daǵy turaqty ókili Qaırat Omarovtyń jáne BUU-nyń Qazaqstandaǵy turaqty ókili Shımýra Norımasanyń qatysýymen ótken BUU Bas hatshysynyń jedel daıyndyq jónindegi orynbasary Atýl Haremen kezdesý barysynda birqatar ózekti máseleler talqyǵa salyndy. BUU-nyń bitimgershilik mıssııasy úshin áskerı tehnıkalar men jylýǵa den qoıǵysh qural-jabdyqtar usyný, spýtnıktik monıtorıng salasyndaǵy yntymaqtastyq, sonymen qatar tsıfrlandyrý men telemedıtsına salasynda ózara is-qımyldy keńeıtý jaıynda sóz boldy», - delingen mınıstrlik taratqan aqparatta.

Kezdesý barysynda BUU Bas hatshysy orynbasarynyń qazaqstandyq áskerı tehnıkalalardy BUU bitimgershilik mıssııalaryna paıdalaný týraly usynysy qoldaý tapty. Sebebi Qazaqstan bul baǵyttaǵy yntymaqtastyqty nyǵaıtýǵa aıtarlyqtaı áleýet pen umtylysqa ıe.

«Búgingi kúni Qazaqstanda áskerı tehnıkalar men qural-jabdyqtardy, onyń ishinde saýytty avtomobılderdi, tikushaqtardy, jylýǵa den qoıǵysh qural-jabdyqtardy, qarý-jaraq pen oq-dárini shyǵaratyn jetkilikti kásiporyn jumys isteıdi. Jáne de biz osynaý áskerı áleýet beıbitshilikti saqtaý isine qyzmet etkendigine múddelik tanytamyz», - dep atap ótti Asqar Jumaǵalıev.

Óz kezeginde Atýl Hare jaqyn aradaǵy Birikken Ulttar Uıymy júrgizetin satyp alýlar baǵdarlamasyna qatysý múmkindigi týraly kásipkerlerdiń habardar bolý múmkinshiligin arttyrýǵa arnalǵan bıznes-semınarlar ótkizý josparlanyp otyrǵanyn aıtty.