BUU Qazaqstanda júrgizilip jatqan tyń bastamalardy qoldaıdy - Amına Muhammed

NUR-SULTAN. QazAqparat – Birikke Ulttar Uıymy Qazaqstanda júrgizilip jatqan reformalardy qoldaıdy. Bul týraly QR Syrtqy ister mınıstrligindegi baspasóz máslıhatynda BUU Bas hatshysynyń birinshi orynbasary Amına Muhammed málim etti, dep habarlaıdy QazAqparat tilshisi.

«Qazaqstannyń 30 jyl boıy eldiń turaqty damýy baǵytyndaǵy qadamdaryn quptaımyz. Búgingi kezdesý barysynda Qazaqstan Prezıdenti Qasym-Jomart Toqaev eldiń damýy jolyndaǵy mańyzdy maqsattardy atap ótti. Biz Qazaqstandaǵy saıası reformalardyń protsesin qoldaımyz. Atap aıtqanda, sátti ótken refrendým turǵysynda bul taqyryp asa mańyzdy», - dedi A.Muhammed.

Sonymen qatar ol Qazaqstandaǵy tyń bastamalar eldiń ilgeri damýyna múmkindik beretinin atap ótti.

«Atalǵan reformalardy adam quqyqtary boıynsha halyqaralyq normalar men standarttarǵa saı tıimdi júzege asyrýǵa, sondaı-aq azamattyq qoǵammen ózara is-qımyldy eskerýge shaqyramyz», - dedi BUU Bas hatshysynyń birinshi orynbasary.

Budan buryn habarlanǵandaı, búgin Memleket basshysy Qasym-Jomart Toqaev Ortalyq Azııaǵa sapary aıasynda Qazaqstanǵa kelgen BUU Bas hatshysynyń birinshi orynbasary Amına Muhammedti qabyldady.

Aıta keteıik, QR Ortalyq referendým komıssııasy 5 maýsymda ótken Qazaqstan Konstıtýtsııasyna ózgertýler men tolyqtyrýlarǵa qatysty referendým qorytyndysyn jarııa etti. Osy oraıda Konstıtýtsııaǵa usynylǵan ózgerister qabyldandy.