BUU Qazaqstan Prezıdentiniń halyqaralyq bastamalaryn qoldaıdy
Dıplomatty taǵaıyndalýymen quttyqtaǵan Senat Tóraǵasy M.Enchanyń BUU Preventıvtik dıplomatııa jónindegi aımaqtyq ortalyǵynyń basshysy laýazymyndaǵy jemisti qyzmetin atap ótti. «Ortalyq Azııa jónindegi baı tájirıbeńiz ben bilimińiz Sizdiń budan bylaıǵy jaýapty jumysyńyzda paıdaly bolatyny kúmánsiz», - dedi Q.Toqaev.
Jahandyq qaýipsizdikti qamtamasyz etýdegi Qazaqstannyń erekshe rólin atap ótken M.Encha BUU Bas hatshysy ıadrolyq qarýsyzdaný jáne ony taratpaý úderisterine Qazaqstan Prezıdenti N.Nazarbaevtyń úlesin joǵary baǵalady.
BUU qyzmetkeriniń pikirinshe, Azııa qurlyǵyndaǵy qaýipsizdikti qamtamasyz etýde Azııadaǵy ózara is-qımyl jáne senim sharalary keńesin shaqyrý týraly Qazaqstan Prezıdentiniń bastamasy mańyzdy bolyp tabylady. M.Encha Azııadaǵy senim jáne yntymaqtastyq sharalaryn nyǵaıtýdyń is júzindegi tetikteri ázirlengen AÓSShK-niń Shanhaıdaǵy 4 sammıtiniń nátıjelerin oń baǵalady.
Álemdik jáne dástúrli dinder lıderleri Sezi Hatshylyǵynyń Basshysy Q.Toqaev júzdesýshini bıylǵy 10-11 maýsymda Astanada ótetin V Sezge ázirlik týraly habardar etti jáne osy keleli forýmǵa Memleket basshysynyń shaqyrýymen BUU Bas hatshysy Pan Gı Mýnnyń mártebeli meıman retinde qatysýynyń erekshe mańyzdylyǵyn atap ótti.
Álemdik jáne dástúrli dinder lıderleri Sezin shaqyrý týraly bizdiń elimizdiń Memleket basshysynyń bastamasyn joǵary baǵalaǵan M.Encha Qazaqstan Prezıdentiniń V Sezge shaqyrýyna oraı BUU Bas hatshysynyń rızashylyǵyn jetkizdi. «Dinı ekstremızmge baılanysty ózekti máseleler shıelenise túsken qazirgi zamanda bul forým erekshe mańyzdy. Sondyqtan Sezdiń mańyzy zor, ony shaqyrý týraly bastama ýaqyt talabyna saı jáne qajet», - dedi M.Encha. Onyń aıtýynsha, BUU basshysy V Sezge qatysýdy josparlap otyr.