BUU Qaýipsizdik keńesi Soltústik Koreıanyń sýtegi bombasyn synaýyn aıyptady

ASTANA. QazAqparat - BUU Qaýipsizdik keńesi Phenıannyń sýtegi bombasyn synaqtan ótkizý jaıyndaǵy málimdemesin qatty synǵa aldy, dep habarlaıdy Bı-Bı-Sı agenttigi.

KHDR málimdemesine baılanysty shaqyrtylǵan Qaýipsizdik keńesiniń shuǵyl otyrysynda birlesken málimdeme jasaldy. Ony keńestiń 15 múshesi, onyń ishinde Phenıannyń odaqtasy bolyp sanalatyn Qytaı da qoldap shyqty.

Málimdemede sýtekti bombany synaqtan ótkizý Qaýipsizdik keńesiniń aldyńǵy qararyn tikeleı buzatyndyǵy aıtylǵan. Osyǵan baılanysty BUU Qaýipsizdik keńesi Soltústik Koreıaǵa qatysty taǵy bir qarar jobasyn ázirlep, Phenıanǵa qarsy salynatyn sanktsııany kúsheıtýdi oılastyryp otyr.

Qaýipsizdik keńesiniń músheleri Phenıannyń taratqan sýtegi bombasyn synaqtan ótkizý týraly aqparaty shyndyqqa aınalsa, bul ǵalamshardyń beıbitshiligi men qaýipsizdigine eleýli qaýip tóndiretinin atap ótti.

Budan buryn kóptegen elder, onyń ishinde Reseı men AQSh sýtegi bombany synaqtan ótkizý týraly aqparat rastaýdy qajet etetinin atap ótip, Phenıan málimdemesine kúmánmen qarap keldi.

Ári kóptegen memleketter men halyqaralyq uıymdary Soltústik Koreıanyń joıqyn qarýdy synaýyna úzildi kesildi qarsy shyqty. Onyń ishinde AQSh, Reseı, Ońtústik Koreıa, Japonııa, sondaı-aq NATO men EQYU bar.