BUU Qaýipsizdik keńesi: OA elderi Qazaqstanǵa joǵary baǵa berdi

ASTANA. QazAqparat - Ortalyq Azııa elderiniń syrtqy saıası vedomstvo basshylary Qazaqstannyń BUU Qaýipsizdik Keńesiniń tóraǵalyq etý jumystaryna joǵary baǵa berdi, dep habarlaıdy QazAqparat SІM baspasóz qyzmetine silteme jasap.

Nıý-Iorkte BUU Qaýipsizdik keńesiniń otyrysy qarsańynda «Qaýipsizdik pen damýdyń ózara táýeldilik úlgisi retinde Aýǵanstan men Ortalyq Azııada aımaqtyq seriktestik qurý» taqyrybynda Ortalyq Azııa - Qazaqstan, Qyrǵyzstan, Tájikstan men Ózbekstan syrtqy ister mınıstrleriniń kezekti kezdesýi ótti. Kezdesýge Túrikmenstannyń atynan BUU janyndaǵy Turaqty ókil qatysty.

Qazaqstandyq tarap 2017 jyly Qaýipsizdik keńesiniń quramyndaǵy jumysyna qoldaý kórsetkenderi úshin ortalyq-azııalyq áriptesterine alǵys aıtty.

Atalǵan kezdesýde Ortalyq Azııadaǵy ahýal boıynsha jan-jaqty pikir almasyp, óńirlik yntymaqtastyqty odan ári damytý máseleleri qaraldy.

Mınıstrler Ortalyq Azııa elderiniń 2018 jylǵa syrtqy saıası is-sharalarynyń kúntizbesin talqylady.

Delegatsııa basshylary aımaqtyq jáne halyqaralyq kún tártibindegi kóptegen máseleler boıynsha Ortalyq Azııa elderi ustanymdarynyń sáıkes keletinin atap ótti.

Jıynda OA elderiniń Aýǵanstanmen uzaq merzimdi yntymaqtastyqty damytýǵa degen umtylysy atap ótildi.

Kezdesý sońynda syndarly dıalog pen ózara tıimdi yntymaqtastyq negizinde aımaqtyq máselelerdiń birlesken sheshimin ázirleý boıynsha besjaqty ózara árekettestikti jandandyrý týraly kelisimge qol jetkizildi.