BUU: Internet qoldanýshylardyń 30 paıyzy - balalar

NUR-SULTAN. QazAqparat – Internet qoldanýshylardyń 30 paıyzy - balalar, keıbir elderde olardyń úshten bir bóligi kıberbýllıng qurbandary bolyp otyr. Mundaı derek turaqty damý múddesinde BUU Komıssııasynyń keńjolaqty baılanys jónindegi jańa baıandamasynda keltirilgen, dep habarlaıdy BUU Jańalyqtar qyzmeti.

Sarapshylar Internet balalardyń bilim jáne aqparat alý múmkindikterin keńeıtip, olardyń onlaın-oıyn-saýyqtyń sheksiz álemine esik ashqanyn aıtady. Sonymen qatar, vırtýaldyq keńistikte kámelettik jasqa tolmaǵandarǵa qaýip tónýde. Baıandamaǵa sáıkes, ata-analardyń 17%-y balalarynyń kıberbýllıngke – ınternettegi kemsitýge ushyraǵan. Keıbir elderde bul kórsetkish 37%-ǵa jetip otyr. 9-17 jas aralyǵyndaǵy árbir besinshi bala vırtýaldyq keńistikte seksýaldyq sıpattaǵy materıaldarǵa ushyrasady.

Búgingi tańda álemdegi balalar men jasóspirimderdiń shamamen 71% ınternetti paıdalanady, aldaǵy jyldary damýshy elderde keń jolaqty baılanys keńeıse, bul kórsetkish taǵy da ósedi. Alaıda, baıandama deregine sáıkes, tek 21 elde balalardy ǵalamtorlyq qysymnan qorǵaıtyn zań bar.

Zertteýge sáıkes, keıbir balalar vıdeooıyndarǵa táýeldi bolyp, densaýlyqtaryna qaýip tónedi.

Mamandardyń atap ótýinshe, ınternettegi qaýip-qaterlermen kúreste ata-analar, muǵalimder jáne áleýmettik qyzmetkerler mańyzdy ról atqarady. Olar balalarǵa ınternettegi qaýipter týraly aıtyp, belgili bir jaǵdaılarda ózin-ózi qalaı ustaý kerektigin túsindirip, vırtýaldy keńistiktegi minez-qulqyn baqylaýy kerek.