BUU elderiniń jastarymen birlesip ekologııalyq aktsııa ótkizýdi usyndyq - Aıda Balaeva

NUR-SULTAN. QazAqparat - 2021 jylǵy 7-8 sáýirde onlaın formatta BUU Ekonomıkalyq jáne áleýmettik keńesiniń H Jastar forýmy (EKOSOS) ótti.

Bul týraly óziniń Facebook paraqshasynda QR Aqparat jáne qoǵamdyq damý mınıstri Aıda Balaeva jazdy, dep habarlaıdy QazAqparat.

Forýmnyń negizgi taqyryby – «Turaqty damýdyń ekonomıkalyq, áleýmettik jáne ekologııalyq aspektilerine yqpal etetin COVID-19 pandemııasynan keıingi turaqtylyq pen ómirge tózimdilikti qaıta qalpyna keltirý».

QR Aqparat jáne qoǵamdyq damý mınıstri Aıda Balaeva óziniń beıneúndeýinde Qazaqstan Prezıdenti Qasym-Jomart Toqaevtyń BUU Bas Assambleıasynda aıtqan Volonterlerdi jumyldyrýdyń halyqaralyq jylyn jarııalaý týraly Qazaqstannyń bastamasyn qoldaýǵa shaqyrdy.

Sondaı-aq, AQDM basshysy 2021 jyly ekologııalyq aǵartý salasynda birlesken jańa jobalardy júzege asyrýdy usyndy.

«Eldiń turaqty damýynyń mańyzdy negizi qoǵamnyń ekologııalyq saýatyn arttyrý, qoǵamnyń ekologııalyq mádenıeti bolyp tabylady. Mınıstrlik 2021 jyly BUU elderiniń jastaryn tarta otyryp, «Taza planeta» birlesken ekologııalyq aktsııasyn ótkizýdi usynady», — dedi A.Balaeva.

Sonymen qatar, mınıstr ózbek tarapynyń BUU alańynda jastar máseleleri boıynsha dostastyq tobyn qurý jáne BUU-nyń jastar quqyqtary týraly halyqaralyq konventsııa jobasyn ilgeriletý týraly bastamasyn Qazaqstan qoldaıtynyn atap ótti.

Aıta keteıik, ECOSOC Jastar forýmy - jastardyń ómirine áser etetin problemalardy sheshý máseleleri boıynsha múshe memleketter men búkil álemniń jas kóshbasshylary arasyndaǵy ashyq dıalog úshin qurylǵan jahandyq alań bolyp tabylady.