BUU DB Qazaqstanda «jasyl» tehnologııalardy damytýǵa 60 mln. dollar bóldi
Bul týraly búgin BUU Damý baǵdarlamasynyń Qazaqstandaǵy turaqty ókili Mýnhtýıa Altangerel málim etti.
«1993 jyldan bastap, BUU DB Qazaqstanda «jasyl» tehnologııalardy damytý, ásirese aýyldyq jerlerde energotıimdi jabdyqtardy engizý baǵytynda 60 mln. dollar qarajat bóldi. Bizde jaqsy jobalar qalyptasty. Qazaqstannyń barlyq aımaqtarynda jemisti tájirıbelerimiz bar», - dedi ol.
Onyń aıtýynsha, sońǵy jyldary osy baǵyttaǵy úderis qarqyn ala bastaǵan.
«Bizge, ásirese, jergilikti qaýymdastyqpen jumys istegen unaıdy. Olar óte qatty belsendi. Alda bizde budan da úlken nátıjeler bolady dep úmittenemiz. Biz 90-shy jyldar kedeıshilikpen kúres jobalarymen, jumyspen qamtý máselelerimen kóp aınalysqan bolsaq, qıyn kezeń bolǵanyn eshkim jasyrmaıdy, qazir biz tipti basqa jumystarǵa mán berýdemiz. Osydan-aq Qazaqstannyń qanshalyqty qýattana túskenin, áleýetiniń joǵary ekenin kóre alamyz. Biz qazir Qazaqstan tájirıbesin aımaqtaǵy ózge memleketterge kórsete bastadyq. Sondyqtan bizdiń áriptestigimizdiń deńgeıi óte joǵary satyǵa kóterildi», - dep atap ótti M.Altangerel.
Ókildiń sózi boıynsha, BUU DB budan bólek 40-qa tarta jobany qolǵa alyp otyr.
«Qarajat granttyq negizde bólinedi. Kez kelgen uıym qatysa alady. Mysaly, jaqynda múmkindigi shekteýli azamattarmen aınalysatyn qoǵamdyq uıymdar arasynda granttyq baıqaý ótti. Bul da biz úshin ózekti másele», - dep túıdi sózin M.Altangerel.