BUU: Damýshy elder AQSh-tyń jańa kedendik alymdarynyń qurbanyna aınalady

ASTANA. QazAqparat - AQSh tarapynan qurysh pen alıýmınıı ımportyna jańa kedendik alymnyń engizilýi qarsy shara qoldanatyn múmkindigi joq damýshy elderge soqqy bolyp tıedi. BUU-nyń Saýda jáne damý konferentsııasynyń bas hatshysy Mýhısa Kıtýıı beısenbi kúni osyndaı pikir bildirdi, dep habarlaıdy TASS.

Kıtýııdiń sózin keltirgen Reuters agenttiginiń habarlaýynsha, damýshy elder men ótpeli ekonomıkalar jáne áli tolyq damymyǵan elder AQSh-qa qarymta jaýap qaıtarýǵa qaýqarsyz.

AQSh Kongresindegi respýblıkashyldar prezıdent Donald Tramptyń qurysh pen alıýmınıı ónerkásibi ımportyna kedendik alymdardy egizýi bastamasyna birden qarsy shyqty. Mundaı qadamdy kóbine memleket basshysynyń kózqarasyn qoldap júrgen Ókilder palatasynyń spıkeri Pol Raıan da qoldamady.

Buǵan qosa Japonııa úkimetiniń Dúnıejúzilik saýda uıymynyń (DSU) sotyna qurysh pen alıýmınııge kedendik alym engizý jónindegi sheshimi úshin AQSh-qa qarsy shaǵym túsirýi múmkin ekendigi jóninde de habar tarady. Mundaı pikirdi juma kúni Japonııanyń Ekonomıka, saýda jáne ónerkásip mınıstri Hırosıge Seko bildirgen bolatyn.

«Osynyń barlyǵy ókinishti, árıne. Biz Dúnıejúzilik saýda uımynyń aıasynda qarymta qadamdar uıymdastyrý jaǵyn qarastyramyz»,-dedi Seko.
Japonııa AQSh-qa jylyna 2 mln tonna qurysh eksporttaıdy. Bul Japonııa eliniń jalpy eksportynyń 5 protsenti.

Beısenbi kúni AQSh prezıdenti Donald Tramp qurysh jáne alıýmınıı ónimderiniń ımportyna kedendik baj engizý týraly qujatqa qol qoıdy. Prezıdenttiń pikirinshe, baj mólsheri qurysh úshin 25% alıýmınıı úshin 10% quraıdy.