BUU bitimgerlik mıssııalaryna qatysý Qazaqstannyń álemdik arenadaǵy rólin arttyrady – senator

<p>ASTANA. KAZINFORM &ndash; Senat depýtaty Alısher Satvaldıev Memleket basshysynyń BUU mıssııalaryna qatysý úshin Qarýly Kúshterdiń bitimgerlik kontıngentin jiberý týraly usynysyna qoldaý bildirdi.</p>

«Memleket basshysynyń BUU mıssııalaryna qatysý úshin Qarýly Kúshterdiń bitimger kontıngentin jiberý týraly usynysyn qoldaımyn. Bul qadam elimizdiń halyqaralyq mindettemelerin turaqty oryndaı otyryp, BUU-nyń tolyqqandy múshesi retinde Qazaqstannyń álemdik arenadaǵy rólin arttyrýǵa yqpal etedi dep oılaımyn», - dedi A. Satvaldıev.

Senator elimiz álemdik qaýymdastyqtyń jaýapty múshesi retinde 2000 jyldan beri BUU aıasyndaǵy bitimgerlik operatsııalarǵa qatysyp, álemdegi qaqtyǵys aımaqtarynda qaýipsizdik pen turaqtylyqty qamtamasyz etýge úles qosyp kele jatqanyn atap ótti.

«Senattyń Halyqaralyq qatynastar, qorǵanys jáne qaýipsizdik komıtetiniń músheleri byltyrǵy jeltoqsan aıynda Bitimgershilik operatsııalar ortalyǵynyń qyzmetimen tanysty. «Bitimger» oqý-jattyǵý ortalyǵyna barǵan kezde, ulttyq kontıngentti BUU bitimgershilik mıssııalaryna qatysýǵa daıyndaý erekshelikterimen tanysyp, áskerı qyzmetkerlerdiń qarý-jaraqpen, áskerı tehnıkamen jáne múlikpen jabdyqtalýyn qarap shyqtyq. Bul rette, bizdiń bitimgerler aldaǵy ýaqytta da Qazaqstan atynan óz mindetin abyroımen atqarýǵa daıyn ekenine senimdimin», - dedi Alısher Satyvaldıev.

Onyń aıtýynsha, bizdiń kontıngenttiń mıssııaǵa qatysýy elimizdiń Qarýly Kúshterine zor tájirıbe jınaqtaýǵa múmkindik beredi.

«Bizdiń bitimgerler qaqtyǵystardy toqtatýda jáne halyqaralyq qatynastarda jańa tájirıbeni meńgerip qana qoımaıdy, sonymen qatar basqa da elderdiń áskerleriniń jaýyngerlik is-qımyldarynyń erekshelikterimen jáne olardyń qarý-jaraqtarymen tanysady», - dedi depýtat.