BUU bıligi áıeldiń qolyna tıe me?

ASTANA. QazAqparat - BUU Bas hatshysy Pan Gı Mýn 2016 jyly qyzmetinen ketken soń bul laýazymǵa Jańa Zelandııanyń burynǵy Premer-Mınıstri Helen Klark óziniń kandıdatýrasyn usynýy múmkin, dep habarlady sheteldik BAQ.

Ol buǵan deıin «BUU basshylyǵyna áıeldiń kelýi álem úshin qajet», dep málimdeme jasaǵan bolatyn.

H.Klark qazirgi ýaqytta BUU-da mańyzdylyǵy jaǵynan úshinshi laýazymdy qyzmette. Ol osy uıymdy damytý baǵdarlamasyna jetekshilik jasaıdy.

Jýrnalısterdiń BUU-ny áıel basqaratyn ýaqyt jetti me degen saýalyna jaýap bergen ol: «Menińshe, búkil álem áıelderi bul suraqqa «Iá!» dep jaýap berer edi. 2016 jyly áıel AQSh Prezıdenti laýazymyna negizgi kandıdattyń biri bolady. Qazirdiń ózinde Halyqaralyq valıýta qoryn áıel basqarady. AQSh Federaldy rezerv qyzmetiniń basshylyǵynda da áıel bar. Áıelder kóptegen bıikterdi baǵyndyrýda. Demek, áıelderdiń de «BUU-ǵa she?» dep suraıtyn ýaqyt keledi», - dedi.

Aıta keteıik, 1999 jyly Helen Klark Jańa Zelandııanyń tuńǵysh áıel Premer-Mınıstri bolǵan edi.