BUU basshysy jemqorlyq týraly: Ashkózdik barlyǵyna zııan keltiredi
Jıynda BUU-nyń Bas hatshysy Antonıý Gýterrısh pen BUU-nyń Esirtki jáne qalmys jónindegi basqarmasynyń Atqarýshy dırektory Geda Valı sybaılas jemqorlyq álemniń barlyq elderinde bar ekennin aıtty. Onyń saldarynan salyq tóleýshilerdiń qaltasynan shyqqan trıllıondaǵan dollar aýrýhanalar men mektepterge jetpeı, jemqorlardyń qaltasynda qalady.
«Sybaılas jemqorlyq qoǵamda keń taralǵan bolsa, adamdardyń kóshbasshylar men mekemelerge degen seniminen aıyrady. Ol teńsizdikti ýshyqtyryp, arsyzdyqqa aparady, áıelder men qyzdardyń jaǵdaıyn odan saıyn qıyndata túsedi. Ashkózdik barlyǵyna zııan keltiredi», - dedi BUU Basshysy beınejoldaýynda.
Antonıý Gýterrısh sybaılas jemqorlarmen birge kúresýge shaqyrdy.
«Úmitti qaıta jaǵyp, ınstıtýttarǵa degen senimdi qalpyna keltireıik. Qaýipsiz jáne ádil bolashaq úshin áreket jasaıtyn ýaqyt keldi», - dedi ol.
Aıta ketsek, 2003 jyly 31 qazanda BUU-nyń Bas Assambleıasy Sybaılas jemqorlyqqa qarsy konventsııany qabyldap, ol 2005 jyly 14 jeltoqsanda kúshine endi. BUU-nyń Sybaılas jemqorlyqqa qarsy konventsııasyna múshe elder konferentsııasynyń toǵyzynshy sessııasy 17 jeltoqsanǵa deıin sozylmaq. Konferentsııa aıasynda sybaılas jemqorlyqtyń túrli aspektilerine arnalǵan 75 shara ótedi.