BUU basshysy: Klımat turaqtylyǵyna aqsha salý qaıyrymdylyq emes, erteńniń qamy

<p>ASTANA. KAZINFORM &ndash; Ázerbaıjan astanasy Bakýde ótken &laquo;COP29&raquo; klımat sammıtinde Birikken ulttar uıymynyń bas hatshysy Antonıý Gýterrısh klımat ózgerisimen kúres kezek kúttirmeıtinin aıtyp, álem jurtyna úndeý tastady. Bul týraly Kazinform-nyń <a href="https://www.inform.kz/ru/klimaticheskiy-sammit-cop29-srochniy-priziv-gensekretarya-oon-k-deystviyu-8e0922" target="_blank" rel="noopener">menshikti tilshisi </a>habarlaıdy.</p>

Jahandyq jylynýdyń saldary álem jurtynyń aldyna tosatyn qıyndyqtar men qaýipter týraly aıtqan Antonıý Gýterrısh 2024 jylǵy tarıhta bolmaǵan aptap ystyqty tabıǵattyń adamzatqa joldaǵan eskertýine balady. Sondaı-aq, ol álemniń ár túkpirindegi daýyldar, jahandyq jylyný saldaryna teńizdegi tirshilik áleminiń jutańdanýy, aýa raıynyń tepe-teńdigin buzyp jatqan ystyq aǵystar da adamzattyń bas aýrýyna aınalyp otyrǵanyn aıtty.

«Bul apattyń bári klımattyń adam tirshiliginiń áserinen ýshyǵyp jatyr. Odan eshbir memleket saqtandyrylmaǵan. Tipti klımattyń ózgerýi ekonomıkaǵa da keri áserin baıqatyp úlgerdi. Búkil álemde baǵalar ósip, saqtandyrý jarnalary qymbattap jatyr», - dedi BUU Bas hatshysy.

A.Gýterrısh klımattyń ózgerýi álem elderiniń arasyndaǵy tirshilik deńgeıiniń aıyrmashylyǵyn arttyra beretinin atady. Oxfam halyqaralyq uıymynyń málimetin dáıeksóz etken BUU basshysy mıllıarder baılardyń 90 mınýt ishinde qorshaǵan ortany lastaýǵa qosqan «úlesi» qarapaıym adamnyń ómir boıy qosqan «úlesine» teń ekenin aıtty.

Sondaı-aq, ol kóshbasshy elderdiń basshylarynyń esine «COP28» sammıtinde moıyndaryna alǵan mindettemelerdi saldy. Ótken sammıtte jer qoınaýynan alynatyn otyn túrlerin shekteý máselesi týraly kóp aıtylǵanymen, nátıjesi shamaly bolǵanyn atap ótti.

Aıtýynsha, jahandyq jylynýdyń qarqynyn 2030 jylǵa deıin jylyna 1,5°C deńgeıinde ustap turý úshin 2019 jyly qorshaǵan ortaǵa tastalǵan shyǵaryndynyń kólemin 43 paıyz azaıtý kerek.

A.Gýterrısh damyǵan elderdi klımat ózgerýinen eń kóp zardap shegip jatqan qaýymdarǵa kórsetiletin kómekti eki ese arttyryp, 2025 jyly onyń kólemin keminde 40 mlrd dollarǵa jetkizýge shaqyrdy.

BUU bas hatshysy klımatqa ınvestıtsııa salý qaıyrymdylyq emes, barshaǵa qajet ınvestıtsııa ekenin ekenin aıtty.

Eske salaıyq, búgin Prezıdent Qasym-Jomart Toqaev Dúnıejúzilik klımat sammıtine qatysý úshin Bakýdegi olımpıadalyq stadıonǵa bardy. Sosyn Memleket basshysy Bakýdegi Dúnıejúzilik klımat sammıtinde sóz sóıledi.