BUU Bas hatshysy jastarǵa úndeý joldady
«Biz 2020 jylǵa belgisizdik pen qaýipti jaǵdaıda, tamyry tereńge ketken teńsizdik pen óshpendilik órshigen, álemdegi áskerı qaqtyǵystar men jer sharymyz jylynyp bara jatqan mezette aıaq basqaly otyrmyz. Klımattyń ózgerýi - uzaqmerzimdi sıpattaǵy problema ǵana emes, aıqyn ári tikeleı qaýipke ákep soǵatyn ahýal. Jer sharyn órt sharpyp jatqan ýaqytta bos sózben qol qýsyryp otyrǵan býyn bop qalýymyzǵa jol bermeýimiz kerek», - deıdi vıdejoldaýynda Antonıý Gýterrısh.
BUU Bas hatshysy dese de áli úmit bar ekenin atap ótti.
«Men osynaý jańa jyldyq joldaýymdy osy úmittiń súıenishi – búkil álem jastaryna arnaǵym keledi. Klımattyń ózgerýine men genderlik teńdikten bastap áleýmettik ádilettilik pen adam quqyqtaryn saqtaýǵa deıingi kúreste sizdiń býyn «aldyńǵy qatarda» ári basty nazarda tur. Men sizderdiń ynta men batyldyǵyńyzǵa tamsanamyn. Sizder ádiletti túrde bolashaq qurylymyn jasaýǵa qatysýdy talap etip otyrsyzdar. Men sizderdi tolyq túsinemin. Birikken Ulttar uıymy sizderdiń jaǵyńyzda, ol - sizderdiń uıymyńyz», - deıdi ol.
Antonıý Gýterrısh 2020 jyly Birikken Ulttar uıymynyń qurylǵanyna 75 jyl tolatynyn eske saldy.
«Biz turaqty damý turǵysynda maqsattarǵa jetý boıynsha on jyldyq is-qımyldarǵa – ádiletti jahandaný múddesi úshin áreket josparyna kiriskeli otyrmyz. Álem jastardyń óz oıyn ashyq bildirýine muqtaj. Aýqymdy túrde oı órbitip, jańa kókjıekterdi asha berińizder. Tabandylyqty álsiretpeńizder. 2020 jyly men sizderge baqyt pen tynyshtyq tileımin. Rahmet!», - dedi BUU Bas hatshysy.