BUU Bas hatshysy KHDR-dan arandatýshylyqty toqtatýdy talap etti

ASTANA. QazAqparat - BUU Bas hatshysy Antonıý Gýterrısh KHDR-dyń seısenbi kúni zymyran ushyrǵanyn synǵa alyp, eldiń basshylyǵynan arandatýshylyq áreketterdi toqtatýyn talap etti. Ol bul joly synalǵan qurlyqaralyq zymyran bolýy múmkin ekendigin atap ótip, Phenıandy eldiń ıadrolyq qarý men ony jetkizý quraldaryn shyǵarýǵa tyıym salatyn Qaýipsizdik Keńesiniń rezolıýtsııasyn oryndaýǵa shaqyrdy. Bul týraly bas hatshynyń resmı ókili Stefan Dıýjarrıktiń málimdemesinde baıandaldy, dep habarlaıdy TASS.   

«Bas hatshy 2017 jyldyń 4 shildesi kúni Koreı Halyq-Demokratııalyq Respýblıkasynyń ushyrǵan qurlyqaralyq ballıstıkalyq zymyranyn qatty synǵa aldy. Bul áreketter Qaýipsizdik Keńesi rezolıýtsııasynyń buzylýy bolyp tabylady jáne jaǵdaıdy odan ári ýshyqtyryp jatyr. KHDR arandatýshylyq áreketterin toqtatyp, óziniń halyqaralyq mindetterin tolyqtaı oryndaýy tıis», - dep atap ótti málimdemede.

Seısenbi kúni KHDR ortalyq televıdenıesi "Hvanson-14" qurlyqaralyq ballıstıkalyq zymyranyn alǵash ret sátti synaqtan ótkizgenin jarııa etti. Soltústikkoreıalyq taraptyń málimdemesinde zymyran ushyrylymynyń bıiktigi  2802 shaqyrymdy quraıdy delingen. Sondaı-aq zymyran 39 mınýtta 933 shaqyrymdy ushyp ótken. Ushyrý týraly buıryqty KHDR Prezıdenti Kım Chen Yn bergen. Ol sondaı-aq synaqty ózi baqylaǵan.