BUU-áıelder: 52,6 mln jaldamaly jumysshynyń tórtten birin qyz-kelinshekter quraıdy

ASTANA. QazAqparat - Halyqaralyq eńbek uıymynyń sońǵy derekterine súıensek, álem boıynsha 52,6 mln adam úı qyzmetshisi bolyp jumys isteıdi eken. Bul týraly búgin Astanada ótken ulttyq konsýltatıvtik keńes barysynda BUU-áıelder uıymynyń Ortalyq Azııadaǵy kóptarapty bólimniń Qazaqstandaǵy baǵdarlamalar jónindegi mamany Gúlnár Smaıylova málim etti.

«Halyqaralyq eńbek uıymynyń sońǵy derekterine súıensek, álem boıynsha 52,6 mln adam úı qyzmetshisi bolyp jumys isteıdi. Onyń tórtten biri qyz-kelinshekterdi quraıdy. Sondyqtan BUU áıelder uıymy «Eńbek jáne kóshi-qon týraly ulttyq zańnamalar: Qazaqstandaǵy úı qyzmetkerleriniń quqyqtaryn tıimdi sheshý» jobasyn qoldaımyz. Naqty qandaı máseleni sheshý kerek degenge kelsek, birinshiden zańnamaǵa úı qyzmetshileriniń, sonyń ishinde áıelderdiń quqyǵyn qorǵaıtyn normalardy engizý kerek», - deıdi maman. Onyń aıtýynsha, kún tártibindegi taǵy bir ózekti másele - jumys beretin jekemenshik agenttikterdiń jaýapkershiligin kúsheıtý kerek. «Ekinshiden, adamdarǵa jumys taýyp beretin jekemenshik agenttikterdiń jaýapkershiligin kúsheıtý kerek. Sebebi qazir Qazaqstanda «Eńbek týraly» zańnyń arasynda jekemenshik jumys berý agenttikteriniń qyzmeti týraly qysqasha jazylǵan, alaıda olardyń jaýapkershiligi jazylmaǵan. Sondyqtan osy eki máseleni kún tártibine shyǵaryp otyrmyz», - deıdi G.Smaıylova.