BUU Astanadaǵy «EKSPO-2017» alańynda eki iri shara ótkizýdi josparlap otyr

ASTANA. QazAqparat - Astanada «Bolashaq energııasy» taqyrybymen ótetin «EKSPO-2017» Halyqaralyq mamandandyrylǵan kórmesiniń ashylýy barysynda BUU deńgeıinde eki shara josparlanyp otyr. Atap aıtqanda, Astanada Ornyqty damý múddesindegi energetıkalyq halyqaralyq forýmy jáne Energetıka máseleleri jónindegi Mınıstrlikter otyrysy ótkizilmek. Bul týraly BUU janyndaǵy Qazaqstannyń turaqty ókili Qaırat Omarov pen BUU bes Óńirlik komıssııa ókilderiniń BUU dıplomatııalyq korpýs ókilderine arnalǵan brıfınginde málim boldy, dep habarlaıdy QazAqparat QR syrtqy ister mınıstrliginiń baspasóz qyzmetine silteme jasap.

Energetıka ulttyq damýǵa, jahandyq ekonomıkalyq ósimge septik tıgizedi jáne 2015 jyldyń qyrkúıegindegi BUU Sammıtinde álemdik kóshbasshylar bekitken Ornyqty Damý Maqsatynyń 17-siniń negizin  quraıdy. Osyǵan baılanysty jańartylatyn energııa óndirisin damytý jáne tutynýdy arttyrý mindetteri 2030 jylǵa qaraı klımat ózgerýiniń ornyqtylyǵyna, ekonomıkalyq ósim men kedeılik aýqymyn qysqartýǵa kómegin tıgizedi.

Qaırat Omarovtyń atap ótkenindeı,  Astanada ótetin energetıka máseleleri jónindegi Halyqaralyq forým men Mınıstrlikter otyrysy Qazaqstannyń BUU Óńirlik bes komıssııasymen, Halyqaralyq energetıka agenttigimen, Dúnıejúzilik bankpen, Ónerkásiptik damý jónindegi BUU mekemelerimen, Energııa tıimdiligi jónindegi Kopengagen ortalyǵymen, HHІ ǵasyrdaǵy jańartylatyn energııa kózderi salasyndaǵy saıasat jónindegi qaýymdastyqpen yntymaqtastyq aıasynda uıymdastyrylady.

«Brıfıngte BUU Óńirlik ekonomıkalyq komıssııa ókilderi Afrıka (EKA), Latyn Amerıkasy jáne Karıb basseıni (EKLAK), Azııa-Tynyq muhıty jaǵalaýy elderi (ESKATO), Batys Azııa (ESKZA) jáne Eýropa (EEK) elderine arnap sóz sóıledi. Onda Astanada ótetin Mınıstrlikter otyrysy týraly, sonyń ishinde konferentsııanyń negizgi jáne taqyryptyq máseleleri jóninde jan-jaqty baıandaldy. Baspasóz máslıhatynda sóz sóıleýshiler Ornyqty Damý Maqsattaryn iske asyrýdaǵy úılesimdilikti nyǵaıtýdyń sektoraralyq qadamyn yntalandyrýǵa shaqyryp, ornyqty damý salasynyń kún tártibinde júzege asyrylyp jatqan jobalar týraly baıandady. Bul rette Óńirlik komıssııa árbir naqty óńirler úshin energetıka baǵytyndaǵy Ornyqty damý maqsattaryna erekshe nazar aýdara otyryp ózderiniń esepterin jarııa etetin bolady», - delingen baspasóz baıanynda. 

Aıta keterligi, ornyqty damýǵa arnalǵan Energetıka máseleleri jónindegi segizinshi Halyqaralyq forým alǵash ret Mınıstrlikter otyrysymen biriktirilip ótkiziledi. Munyń ózi energetıka salasyndaǵy saıası sheshimder qabyldaıtyn jaýapty qyzmetkerlermen ózara úılesimdilikti arttyrýǵa baǵyttalǵan Qazaqstannyń kúsh-jigerin naqty kórsetip otyr. Mınıstrlikter otyrysyna energetıka salasynyń mınıstrleri, basqa da jaýapty tulǵalar, sonymen birge halyqaralyq uıym ókilderi, halyqaralyq sarapshylar, iskerlik toptar, qarjy sektory men azamattyq qoǵam ókilderi qatysady. Onda qatysýshylar 2030 jylǵa deıingi Kún tártibin júzege asyrý úshin energetıkalyq sektordyń qosatyn úlesi týraly pikir almaspaq. 

Toqtala ketetin jaıt, buǵan deıin Qazaqstan delegatsııasy «Alǵa qaraı jedel qadam - birlese otyryp» atty taqyrypta ótken Barshaǵa arnalǵan ornyqty energetıka (SE4All) jónindegi Úshinshi Forýmǵa qatysqan bolatyn. Oǵan úkimet, iskerlik toptar, azamattyq qoǵam men halyqaralyq uıym  ókilderi qatysyp,  qorshaǵan ortaǵa áseri joǵary elderdegi energııa tıimdilikti arttyrý múmkindikteri talqylanǵan edi. Alqaly basqosýda sharaǵa qatysýshylarǵa «EKSPO-2017» kórmesi týraly aqparattar taratyldy.