Burynǵy narkobaronnyń begemottary Kolýmbııa tabıǵatyna qaýip tóndirip tur
«El Patron» laqap atymen tanymal belgili qylmysker óziniń vıllasyna jaqyn jerde zoobaq uıymdastyrǵan. Onda tórt begemot (úsh analyq bir atalyq) bolǵan. Zojbaqtan qashqan janýarlar 25 jylda eldiń túkpir-túkpirine taralyp ketken. Olar jersinip, kóbeıe bastaǵan. Kolýmbııalyq ekologtar jat jerden jetkizilgen ańdardan keler qaýip kóp, dep otyr.
Bul sýsıyrlar toby - Afrıkadan tys mekenge jersingen jalǵyz popýlıtsııa ǵana. Olardyń sany qazir 35-ke jetken, keıbir málimetterde 50-den asyp ketti dep kórsetiledi. Shırek ǵasyrǵa jýyq ýaqytta janýarlar adam aıaǵy jetpegen djýnglı ormandaryndaǵy ózender men batpaqtardy meken etýde. Olardy burynǵy zoobaqtan júzdegen shaqyrym alystaǵy aýyl turǵyndary da kezdestirýde.
«Bul syrtqy faktorlarǵa tózimdi ınvazıvtik (basqa jerden ákelinip jersingen janýar) túr, - deıdi kolýmbııalyq bıolog Devıd Lopes. - Olar aýrý taratýy múmkin. Sý qoımalaryn lastaıdy».
Ázirge Ońtústik Amerıkanyń san túrli tabıǵatyna syrttan ákelingen janýardyń keltiretin zalalyn eshkim naqty aıta almaıdy. Alaıda qazirgi túr jylyna 6 paıyzben ósýi múmkin. Sany kóbeıgende ǵana olardyń naqty keltirer zalaly anyqtalady. Afrıkada olar jergilikti ekojúıeniń mańyzdy bóligi sanalsa, muhıttyń kelesi betinde kerisinshe tabıǵatqa qaýip tóndiredi.
«Invazıvtik túrler zalal keltiredi. Óıtkeni biz olardyń ekojúıeni búldirip, onyń tolyq ózgerýine, burynǵy kelbetinen aıyrylyp qalýyna sebepshi bolatynyn bilemiz», - deıdi Santa-Barbaradaǵy Kalıfornııa ýnıversıtetiniń bıolog professory Dýglas Makkolı.