Burynǵy mınıstrlerdiń tabysy men dúnıe-múlkin tekserý kerek – depýtat

ASTANA. QazAqparat – Elimizde buryn mınıstr mindetin atqarǵan azamattardyń jeke tabysy men múlkine tekserý júrgizý usynylady. Jibek Joly telearnasyndaǵy «JJ Talk» baǵdarlamasynyń efırinde depýtat Erlan Saıyrov osy máseleni kóterdi, dep habarlaıdy QazAqparat tilshisi.

«Sybaılas jemqorlyq problemasy boıynsha aıtarym, balyq basynan shirıdi. Joǵary bılikte otyrǵan azamattardyń aýzyn tyımaı, beri jaǵynan tyıý múmkin emes. Bul jerde jemqorlyq problemasy tek memleket pen onyń bıýdjetine ǵana baılanysty emes. Bul jerde bank júıesi de bar», – dedi Májilis depýtaty Erlan Saıyrov telebaǵdarlama efırinde.

Depýtattyń aıtýynsha, paraqorlyqpen kúreste mınıstrler men ákimderdiń taza ári adal qyzmet etýi mańyzdy.

«Bizde qaı ákimniń qandaı bıznesi bar ekenin búkil Qazaqstan biledi. Maǵan 30 jyl bıznespen aınalysyp kele jatqan azamat burynǵy mınıstrlerdiń qandaı úıi, dúnıe-múlki baryn aıtty, quny 1-1,5 mln dollar turady dedi. «30 jyl bıznespen aınalysyp júrgen men ondaı úıdi ala almaımyn» deıdi álgi bıznesmen. Meniń oıymsha, sol burynǵy mınıstrlerdiń tabysy men múlkin tekserý kerek. Qazir zań shyqty, eger memlekettik qyzmetker dúnıe-múlkin qalaı tapqanyn dáleldeı almasa, onda ony memleketke qaıtarýy tıis. Osy baǵytta jumysty kúsheıtý kerek», - deıdi ol.

Buǵan deıin Erlan Saıyrov mindetin durys atqarmaǵan mınıstrlerdi ornynan alý jóninde usynys aıtylatynyn jáne naqty kandıdattardyń da baryn málim etken edi.