Burynǵy KSRO elderinen AQSh-qa qonys aýdarǵan ardagerler soǵys jyldaryn eske aldy

NUR-SULTAN. QazAqparat – Jyl saıyn mamyrdyń basynda Mıhaıl Vovchýk saltanatty kostıýmin shyǵarady. 100-je jaqyndaǵan shaǵynda Los-Andjeleste tursa da, ol óz saltyn satpaıdy. Ekinshi Dúnıejúzilik soǵys ardageri maıdanǵa qalaı túskeni týraly estelikterin bólisedi, dep habarlaıdy QazAqparat Golos Amerıkı radıokompanııasynyń orys tildi qyzmetine silteme jasap.

Soǵys ardageri Mıhaıl Vovchýk maıdanǵa bala kezinde tústi. Soǵystyń basynda Keńes Odaǵynyń myńdaǵan turǵyny evakýatsııalanǵan Ózbekstan respýblıkasyndaǵy áskerı ýchılışeni támamdaǵannan keıin Mıhaıl maıdanǵa attanady.

«18-19 jastaǵy eki myń balany áskerı poıyzǵa tıep, Stalıngradqa alyp ketti. Bizdiń kýrsanttardy alǵy shepke jetkizý úshin arnaıy áskerı poıyz jiberilgen edi. Al bizdiń komandır «Men óz qyrandarymdy jaıaý jetkizemin» dedi, sosyn biz jaıaýlattyq. Ol birnárse sezgendeı boldy. Poıyzben júrip bara jatqandarǵa nemister tap bolyp, kóp bóligi sol jerde qaıtys boldy», - dep ardager kózine jas alady.

Stalıngrad úshin sol aıqasqa men kóp dostarymdy joǵalttym, ózim de jaraqattandym. Meniń aman qalǵanym ǵajap sanalady.

«Naǵyz dostyq bolatyn, bárimiz birimiz úshin jáne birimiz bárimiz úshin edi. Jeńiske degen senim, jiger jáne halyqtar dostyǵy kómektesti», - deıdi Mıhaıl Vovchýk.

Los-Andjeleste turatyn taǵy bir soǵys ardageri Froım Gelman Ortalyq Azııaǵa evakýatsııalanǵan. Ol kezde 16 jasta bolatyn.

Rýmynııada týǵan Froımdy maıdanǵa alǵysy kelmegen, alaıda ol komandırdi kóndirip alady. Áskerı ýchılışeni támamdaǵannan keıin ony Prımorege jiberedi.

Onda Kýrsk doǵasyndaǵy urysqa qatysqan jasyryn tankige qarsy joıǵysh polk qurylǵan.

Soǵys bastalǵan kezde Lıýdmıla Berenboım 9 jasta bolǵan. Evakýatsııalanǵan basqa balalarmen birge ol úlken kisiler men jaraqat alǵandarǵa kómektesken.

9 mamyrda ardagerler Plammer parktegi qaza tapqan keńes sarbazdaryna qoıylǵan eskertkish aldynda jınalmaq. Ár jyl saıyn munda Batys Gollıvýdtan keletinder sany azaıyp keledi.

«Qazir biz tiri qalǵan 33 adamdy ǵana sanadyq. 10 jyl buryn olardyń sany 800 adam bolatyn», - dedi Batysgollıvýdtyq orys tildi qaýym keńesiniń múshesi Raısa Agýf.

Jeńis kúni Batys Gollıvýd merııasynan ardagerlerge syılyq taratylady: sháınek, shaı men bal.

Eske sala keteıik, búgin Qazaqstan Jeńis kúnin toılap jatyr. Bıyl 1941-1945 jyldary bolǵan KSRO men fashıstik Germanııanyń soǵysyndaǵy Jeńiske 76 jyl toldy.