Burynǵy energetıka vıtse-mınıstrleriniń soty: Kýáger málimdeme jasady

NUR-SULTAN. QazAqparat – Elordada burynǵy energetıka mınıstriniń orynbasary Ǵanı Sádibekov pen Baqytjan Jaqsalıevke qatysty sot otyrysy jalǵasýda, dep habarlaıdy QazAqparat tilshisi.

Sot otyrysy barysynda Energetıka mınıstrliginiń qaldyqtardy basqarý departamenti dırektorynyń burynǵy orynbasary Bızar Dosmaqova kútpegen málimdeme jasady. Onyń kýáligi boıynsha, B.Jaqsalıev Şýche-Býrabaı aımaǵyndaǵy kólderdi tazartý boıynsha jasalǵan jumystarǵa memlekettik saraptamanyń oń qorytyndysynsyz qol qoıylǵanyn bilgen. Іs boıynsha kýáger bul máseleler Energetıka mınıstrliginiń apparattyq keńesterinde jıi kóterilgenin atap ótti.

«Tazartý jumystary 2015 jyly (qyrkúıek-qazan) júrgizildi. Jumys barysynda «Aımaq jáne K» JShS shotyna 800 mln teńge aýdaryldy. Memlekettik satyp alý týraly kelisim-shart aıasynda Jaqsalıev jumys aktilerine qol qoıdy. Oryndalǵan jumys aktisi tundyrylǵan shógindiler kólemine sáıkes kelmegenin Jaqsalıevtiń ózi de biletin», - dedi Dosmaqova sot otyrysy barysynda.

Sondaı-aq, basty kýágerlerdiń biri burynǵy energetıka vıtse-mınıstri Jaqsalıev 2015 jyly Şýche-Býrabaı aımaǵyndaǵy kólderdi tazartý baǵdarlamasynyń úılestirýshisi bolǵanyn jáne onyń oryndalýyna jaýapty bolǵanyn aıtty.

Jaýap bergen kýágerdiń aqparatyna sáıkes, Energetıka vıtse-mınıstri Baqytjan Jaqsalıev Şýche-Býrabaı kýrorttyq aımaǵyndaǵy kóldegi jumystardy 2015 jyldyń tamyzynan bastap baqylap keledi.

Sonymen birge, tenderdi jeńip alǵan kompanııa sý qoımasyn tazartýǵa arnalǵan nemis jabdyqtaryn ákelgeni belgili boldy.

Qylmystyq materıaldarǵa sáıkes, bul qylmystyń izin jasyrý jáne jumys barysyna zańdy sıpat berý úshin jasalǵan.

«Jalpy, 2015 jylǵy 21 qyrkúıekten bastap qazannyń aıaǵyna deıin aktilerde kórsetilgen 109 myń tonnanyń ornyna, kól túbinen tek 3,5 myń tonna tunba shógindileri shyǵarylǵan. Jaqsalıevtiń «jetekshilik etý» kezeńinde qylmystyq toptyń qylmystyq áreketterinen memleketke 746 mıllıon teńge kóleminde materıaldyq zalal keltirilgen», - delingen tergeý málimetinde.

Aıta ketsek, kýáger B.Dosmaqovadan úsh kún boıy jaýap alynǵan edi. Aıyptalýshylardyń qorǵaýshylary oǵan birneshe ret suraq qoıyp, Dosmaqova jaýap berdi.

Sonymen birge, aıyptaýshy tarap B.Dosmaqovanyń aıǵaqtaryn qoldaı otyryp, sottan kýá men burynǵy vıtse-mınıstr B.Jaqsalıev arasyndaǵy aýdıo jazbany tyńdaýdy ótindi. Alaıda aıyptalýshylardyń advokattary belgisiz sebeptermen ony tyńdatýǵa úzildi-kesildi qarsy bolyp otyr.