Búrkitshiler arasynda «Jaıyq qyrany – 2020» týrnıri ótedi

NUR-SULTAN. QazAqparat - 24-26 qańtar aralyǵynda Batys Qazaqstan oblysynyń Terekti aýdany, Saryómir aýylynda búrkitshiler arasynda «Jaıyq qyrany – 2020» respýblıkalyq týrnıri ótedi.

Bul týraly QR Mádenıet jáne sport mınıstrliginiń resmı saıty habarlady.

Ondaǵy málimetterge qaraǵanda, baıqaýǵa elimizdiń ár óńiriniń búrkitshileri jınalady. Qansonar – qazaq halqy úshin burynnan kele jatqan ańshylyq dástúr.

Respýblıkalyq týrnırdiń maqsaty – ulttyq sport túrin nasıhattaý, ishki týrızmdi damytý, ańshylyq salt-dástúrlerimizdi jańǵyrtý.

Bul týrnır 2018 jyldan beri «Ǵylymı zertteýlerge kómektesý qory» jeke qorynyń uıymdastyrýymen ótkizilip keledi. Ótken jyly búrkitshiler ónerin tamashalaý úshin elimizdiń túkpir-túkpirinen jáne Reseıdiń Samara, Tolıattı, Ýlıanovsk, Perm óńirlerinen týrıster kelgen bolatyn.

Eń úzdik búrkitshini anyqtaıtyn jarystyń jalpy júlde qory 1.5 mln. teńge.