Búrkitshi qyz Aısholpan: Qazaqstandaǵy jarystarǵa qatysýǵa daıynmyn
Búginde Aısholpannyń jasy - 17-de. «Qazaqstan» RTRK «Kóshpendiler» atty derekti fılmder toptamasynyń alǵashqy serııasyn Aısholpanǵa arnady. Atalǵan joba aıasynda búrkitshi qyz alǵash ret Qazaqstanǵa kelip, qusbegilik ónerimen qalaı aınalysyp ketkenin aıtyp berdi.
«Qusbegilik - jeti atadan jalǵasyp kele jatqan dástúr, eki myń jyldyq tarıxy bar salt. Ózim kishkentaı kezimnen bastap búrkitpen birge óstim. Aǵam da búrkitshi boldy. Ol oqýdy bitirip, áskerge ketkennen keıin búrkiti úıde qaldy. Men áke-sheshemniń ruqsatyn alyp, búrkitti ózim ustadym. Sodan ákemmen birge taý-tasqa shyqtyq, ań ustadyq», - dedi A.Nurǵaıypqyzy Astanada ótken baspasóz máslıxatynda.
Onyń aıtýynsha, ózi ustap júrgen búrkittiń aty - Aq qanat. Onymen qasqyr alǵan kezderi de bolǵan.
«Men búrkittiń arqasynda kóptegen elderde boldym, kınoǵa tústim. Oskarǵa da usyndy. Mońǵolııada meniń ataǵym shyqqannan keıin búrkitshi qyzdar kóbeıdi. Qazaqstanda qusbegilik jarystar bolsa, kelý jaǵyn oılastyramyn. Árıne, qatysamyn», - dep atap kórsetti A.Nurǵaıypqyzy.
Aısholpannyń anasy Almagúl Kóksegen qyzynyń qusbegilikpen aınalysamyn degen tilegin birden qabyl almady. Biraq Aısholpannyń qyzyǵýshylyǵyn kórgennen keıin qarsylyq bildirgen joq.
«Endi, qyz bala úıde otyryp, sharýasyn isteýi kerek. Bizdi solaı úıretti. Biraq ol ózi talaptanyp, búrkitpen ańǵa shyǵamyn degennen keıin qarsy bolǵan joqpyz. Árıne, qyz bala úshin taý-tasqa shyǵý ońaı emes. Bizdiń jaqta qysta 40 gradýsqa deıin sýyq bolady. Sodan biz ony jyly kıindirip, qoıa beremiz», - deıdi A.Kóksegen.
Aısholpannyń ózi qıyndyqtan qoryqpaıdy eken.
«Óz maqsatyńa jetý úshin ár nársege tóze bilý kerek», - dedi A.Nurǵaıypqyzy QazAqparat tilshisine bergen suxbatynda.
Aıta keteıik, 2014 jyly aǵylshynnyń «Daily Mail» basylymy qusbegilik ónerin ıgergen 13 jastaǵy qazaq qyzy týraly maqala jarııalap, Aısholpandy búkil álemge tanymal etken bolatyn. Osydan keıin rejısser Otto Bell «Búrkitshi qyz» (The Eagle Huntres) atty derekti fılm túsirdi. Atalǵan fılm Oskar syılyǵyna úmitker úzdik 15 fılmniń qataryna endi. Sol kezde fılm avtorlary túsirilim jumystaryn qalaı júrgizgenderin aıtyp berdi.
Al Avstralııa ánshisi Sııa Ferler «Angel by the Wings» atty ánine klıp shyǵardy. Atalǵan shyǵarma Mońǵolııadaǵy búrkitshi qazaq qyzy Aısholpan Nurǵaıypqyzy týraly derekti fılmniń resmı saýndtregi bolyp sanalady.