Býrkıno-Faso quramasynyń oıynshysy «Qaısar» komandasynda synaqtan ótip jatyr
Ótken jyly birinshi lıgada 2-oryn alyp, Premer-lıgaǵa qaıta oralǵan «Qaısar» búgingi kúnderi Túrkııanyń Antalııa qalasynda ekinshi oqý-jattyǵý jıynyn bastap ketti. Daıyndyqqa jańadan taǵy úsh fýtbolshy qosyldy.
Solardyń biri – Býrkına-Faso quramasynda oınaıtyn Ben Azız Zagre jasyl alańda ortalyq qorǵaýshy qyzmetin atqarady. Buǵan deıin Portýgalııanyń «Gımaraınsh», Armenııanyń «Ýlıss», Danııanyń «Esberg» komandalarynda oıyn kórsetken. Ol qyzylordalyq komandanyń Túrkııadaǵy alǵashqy jıynyna qatysyp, Ózbekstan olımpıadalyq quramasyna qarsy kezdesýde gol soqty.
Sondaı-aq, synaqtan ótetin oıynshylar qatarynda ózbekstandyq Shohrýh Abdýrahmonov pen moldovalyq Vladımır Genaıtıs bar.
Ekinshi oqý-jattyǵý jıynynda «Qaısar» alty joldastyq kezdesý ótkizýdi josparlap otyr. Aldymen, 11 qańtarda Ázerbaıjannyń «Shamahy» klýbymen kezdesse, odan keıin 16 qańtarda Kosovonyń «Balkanı», 18 qańtar Ázerbaıjannyń «Kıapaz», 23 qańtarda Serbııanyń «Radnıchkı» klýbtarymen sheberlik baıqasady. Al, 25 qańtarda Bolgarııanyń «Lokomotıv» (Sofııa) komandasymen kezdesse, 26 qańtarda serbııalyq «Vojdavatspen» oınaıdy.
Eske salsaq, budan buryn «Qaısar» komandasyna jańa bas bapker taǵaıyndalǵan edi.
Foto: www.facebook.com/Kaysar fc