Burynǵy vıtse-mınıstr Nurjan Áltaev 10 jylǵa bas bostandyǵynan aıyryldy

<p>Astana qalasynyń qylmystyq ister jónindegi mamandandyrylǵan aýdanaralyq soty asa iri mólsherde para alý faktisi boıynsha eks-vıtse-mınıstr Nurjan Áltaevqa úkim shyǵardy, dep habarlaıdy <a href="https://kaz.inform.kz/" target="_blank" rel="noopener">Kazinform.&nbsp;</a></p>

Sotta eks-vıtse-mınıstr 2018 jyldyń aqpanynan 2020 jyldyń shildesine deıin «Atameken» UKP múddeleri úshin tıimdi resmı sheshim qabyldaýǵa yqpaldasyp, deldal arqyly M.-dan 115 myń AQSh dollary jáne 8 mln 150 myń teńge aqshany para retinde alǵany aıtylǵan.

Sottalýshynyń kinási kýágerlerdiń aıǵaqtarymen, uıaly telefondaǵy hat-habarlarmen, jasyryn tergeý áreketteriniń jazbalarymen, saraptama aktilerimen, zattaı dáleldemelermen dáleldengen. Prokýror aıyptaýdy qoldap, 12 jyl merzimge bas bostandyǵynan aıyrý jazasyn taǵaıyndaýdy surady. Al sottalýshy aqtaýdy ótingen.

Nátıjesinde sot aıyptalýshynyń jas balalarynyń bolýyn qylmystyq jaýaptylyq pen jazany jeńildetetin mán-jaı retinde, al qabyldaǵan antyn buzýy aýyrlatatyn mán-jaı retinde tanyldy.

«Sot úkimimen eks-vıtse-mınıstr Qylmystyq kodekstiń 366-babynyń 4-bóliginde kózdelgen qylmystyq quqyq buzýshylyq úshin kináli dep tanylyp, ómir boıy memlekettik qyzmette qyzmet atqarý quqyǵynan aıyrylyp, 10 jyl merzimge bas bostandyǵynan aıyryldy. Úkim zańdy kúshine engen joq», - dep jazylǵan qalalyq sottyń resmı habarynda.

Eske sala keteıik, bıylǵy 7 maýsymda Májilistiń eks-depýtaty Nurjan Áltaev asa iri mólsherde para aldy degen kúdikpen ustaldy (QK 366-babynyń 4-bóligi).

N.Áltaev 2018 jyldyń aqpanynan 2020 jyldyń shildesine deıin «Atameken» UKP múddeleri úshin tıimdi resmı sheshim qabyldaýǵa yqpaldasyp, deldal arqyly A.Myrzahmetovten para retinde jalpy somasy 50 mln teńgeden astam (115 myń AQSh dollary jáne 8 mln 150 myń teńge) aqshalaı qarajat aldy dep aıyptalyp otyr.

Qylmystyq is 15 tomnan turady, is boıynsha 18 kýáger bar.