Burynǵy bosqyn álemdik Nansen syılyǵynyń laýreaty atandy

<p>BUU Bosqyndar isi jónindegi Joǵarǵy komıssar basqarmasy Nansen atyndaǵy syılyqtyń 2023 jylǵy laýreaty jýrnalıst ári burynǵy bosqyn, bilim alý quqyǵyn qorǵap, Kenııadaǵy bosqyn balalarǵa 100 myńnan astam kitap syılaǵan Abdýllahı Mıre ekenin jarııalady. Kazinform agenttigi bul týraly BUU <a href="https://news.un.org/ru/story/2023/11/1447162" target="_blank" rel="noopener">jańalyqtar saıtyna</a> silteme jasap habarlaıdy.</p>

«Abdýllahı Mıre - jer aýdarylǵan qaýymdastyqtarda álemdi ózgertetin ıdeıalar týyndaı alatynyna tiri dálel», - dedi BUU-nyń bosqyndar isi jónindegi Joǵarǵy komıssary Fılıppo Grandı.

Abdýllahı Mıre Somalıde dúnıege kelip, Kenııadaǵy bosqyndar lagerinde ósken. Ol biraz ýaqyt Norvegııada turdy, biraq óz qaýymdastyǵyna qyzmet etý nıeti ony Afrıka qurlyǵyna qaıtyp oralýǵa ıtermeledi. Mıre Kenııada jýrnalıst bolyp jumys istep, onda Refugee Youth Education Hub uıymyn ashty. Bul uıym bosqyndar lagerlerinde demeýshiler syıǵa tartqan kitaptarǵa toly úsh kitaphana ashty, sondaı-aq osynda kóshirilgen on myńdaǵan balanyń bilim alýy úshin múmkindikterdi keńeıtti.

«Bul – meniń jeke jeńisim emes. Bul menimen birge jumys istep júrgen barlyq eriktilerdiń ortaq syılyǵy... Sondaı-aq bul – mektepterde bilim alyp júrgen balalardyń syılyǵy», - dedi 36 jastaǵy Mıre.

Álemdik syılyq 13 jeltoqsan kúni Jeneva qalasynda Bosqyndar máselelerine qatysty Jahandyq forým barysynda beriledi. Jýrnalıst Enn Karrı júrgizetin sharada tanymal mýzyka oryndaýshylary óner kórsetedi.

Bıyl sondaı-aq Nansen syılyǵynyń aımaqtyq jeńimpazdary da mrapattalady, olardyń arasynda: Elızabet Moreno Barko (Soltústik jáne Ońtústik Amerıka): Kolýmbııadaǵy qarýly ishki qaqtyǵystardan zardap shekken qaýymdastyqtar quqyǵyn qorǵaýshy; Azııa Ál-Mashrekı (Taıaý Shyǵys jáne Soltústik Afrıka): Iemendegi qaqtyǵystardan zardap shekken eki mıllıonǵa jýyq adamǵa kómek kórsetken Turaqty damý qorynyń negizin qalaýshy jáne tóraǵasy; Abdýlla Habıb, Sahat Zııa Gero, Salım Han jáne Shahıda Vın (Azııa-Tynyq muhıty aımaǵy): azamattyǵy joq bosqyndardyń qonys aýdarýy men qıyndyqtaryn qujattaıtyn rohındja halqynyń tórt ókili.

Lena Grohovska men Vladıslav Grohovskıı (Eýropa): qonaq úı jelisi men qaıyrymdylyq uıymy bosqyndarǵa baspana men bilim beretin polıak juby.

Nansen syılyǵy – BUU Bosqyndar isi jónindegi Joǵarǵy komıssar basqarmasynyń jyl saıynǵy bosqyndar quqyqtary salasyndaǵy jetistikter úshin beriletin syılyq. Ol norvegııalyq polıarlyq zertteýshi, Ulttar lıgasynyń bosqyndar jónindegi Joǵarǵy komıssary jáne Nobel beıbitshilik syılyǵynyń laýreaty Frıtof Nansenniń qurmetine atalǵan.