Buryn-sońdy bolmaǵan jaýyn men «Esentaıdaǵy» sorǵynyń isten shyǵýy: Almatyny nege sý basqany belgili boldy

<p>ALMATY. KAZINFORM — Keshe Almatydaǵy Kamensk ústirtinde jarty saǵattyń ishinde jaýyn-shashynnyń qalyptan tys mólsheri jaýyp, «Esentaı moll» saýda ortalyǵyndaǵy jerasty avtomobıl týnneli sý astynda qaldy. </p>

Jaýyn shashyn kólemi ortasha aılyq normadan edáýir asty. Saǵat 18:30–dan bastap ál-Farabı dańǵylyndaǵy (J.Úshkempirov kóshesiniń qıylysy) jańbyr sýy aryq jelisine syımaı, dańǵyldyń jol bóligine qaraı arnasynan shyqty.

Saǵat 19:00–den bastap nóser jaýynnyń sýy ál-Farabı dańǵylynyń jol bóligindegi kólik aıryǵynyń Shyǵys jáne Batys burylystaryna, sondaı-aq «Esentaı» saýda jáne oıyn-saýyq ortalyǵyna qarama-qarsy jerasty jaıaý júrginshiler ótkeline jaıyldy.

Almaty qalasy polıtsııa departamenti qyzmetkerleriniń kúshimen kólik quraldarynyń qozǵalysy burylys aımaǵynda shektetildi.

Buryn sońdy bolmaǵan nóserli jaýynnan kólik aıryǵynyń sorǵy stantsııasynyń avtomat qurylǵylary isten shyqty.

Aıta keteıik, sorǵy stantsııasy «Esentaı» saýda jáne oıyn-saýyq ortalyǵynyń balansynda jáne ol qolmen qosylǵan.

Qazirgi ýaqytta sorǵylar shtattyq rejımde jumys istep jatyr. Týnnelderden sý sorý jumysy qalypty jaǵdaıda júrgizilýde.

Jumysqa qalanyń kommýnaldyq qyzmetteri men Qutqarý qyzmetiniń arnaıy sý sorǵysh tehnıkasy men motopompalary qosylǵan.

Jańbyr jaýa bastaǵan sátten sý tasqynynyń aldyn alý jáne ony joıý, sýdyń kedergisiz ótýin qamtamasyz etý úshin motopompa, bagr jáne ózge de shants quraldarymen jabdyqtalǵan 42 jedel mobıldi brıgadanyń kezekshiligi uıymdastyryldy. 

Aýdan ákimdikteri jumys óndirisin baqylaý boıynsha táýlik boıy kezekshilikte. 

«Qazgıdromet» RMK boljamy boıynsha búgin tústen keıin temperatýra +29…+31 deıin kóteriledi jáne qysqa álsin álsin jańbyr jaýýy yqtımal.