Buryn qazaqstandyqtar Reseıge bilim izdep barsa, qazir tendentsııa kerisinshe — Saıasat Nurbek

<p>ALMATY. KAZINFORM &mdash; Almatyda joǵary bilim berý máselelerine arnalǵan QS Higher Education: Asia Pacific 2024 Pre-sammıti ótti. Onda Ǵylym jáne joǵary bilim mınıstri Saıasat Nurbek elimizdegi halyqaralyq ýnıversıtterdiń jumysyna toqtaldy.</p>

Vedomstvo basshysynyń aıtýynsha, Qazaqstan halyqaralyq ýnıversıtettermen tyǵyz baılanysta jumys istep keledi. Sonyń arqasynda elimizde halyqaralyq JOO-lar sany kóbeıgen.

— Búgingi kúni 34 halyqaralyq ýnıversıtetter Qazaqstanǵa kelýge sheshim qabyldady. Onyń 5-i elimizde óz kampýstaryn salyp jatyr. Cardiff University Astana qalasynda óz ınfraqurylymyn damytady. Ońtústik Koreıanyń Woosong ýnıversıteti Túrkistan oblysynda kampýsyn salyp jatyr. Sondaı-aq, 14 ýnıversıtet qazaqstandyq ýnıversıttermen seriktestikte jumys isteýde. Jergilikti ýnıversıtetter olardy qabyldaýshy retinde ınfraqurylymmen qamtamasyz etip otyr. Mysaly, Arızona shtatynyń ýnıversıtetiniń fılıaly M.Qozybaev atyndaǵy Soltústik Qazaqstan ýnıversıtettiń janynan iske qosyldy, — dedi mınıstr.

Sondaı-aq, Ǵylym jáne joǵary bilim mınıstri elimizge halyqaralyq ýnıversıtetterdiń kelýiniń arqasynda Qazaqstanǵa bilim izdep keletin sheteldik stýdentterdiń qarasy kóbeıgenin atap ótti.

— Reseıden kelgen 1,5 myń stýdent bıyl Qazaqstanda bilim alyp jatyr. Buryn Ortalyq Azııa memleketteriniń, onyń ishinde Qazaqstannyń stýdentteri sapaly bilim alý úshin Reseıge baratyn bolsa, qazir keri baǵytta tendentsııa júrip jatyr. Búgingi kúni reseılik bilim alýshylar bizdiń elimizge sapaly bilim úshin keledi. Qazaqstan jyldam qarqynmen bilim men sapaly zertteýlerdiń jańa habyna, jańa ortalyǵyna aınalyp keledi, — dedi Saıasat Nurbek.

Eske salaıyq, buǵan deıin Ǵylym jáne joǵary bilim mınıstrligi JOO úzdik oqytýshysy ataǵyna konkýrs jarııalaǵanyn jazǵanbyz.