Býrabaıdan «Abylaı hannyń qara joly» ekspedıtsııasy saparǵa attandy
Býrabaıdaǵy Kókshe taýynyń etegindegi Abylaı han alańynnan attanǵan ekspedıtsııa on kún boıy 18-shi ǵasyrdaǵy «Kókshetaý-Aqmola-Ulytaý-Túrkistan» kerýen jolymen júrip ótpek. Taǵylymdy ekspedıtsııa Aqmola oblysynyń ákimi Málik Myrzalınniń tikeleı qoldaýymen jáne qoǵam qaıratkeri Murat qajy Ydyrysulynyń bastamasymen uıymdastyrylyp otyr. Ekspedıtsııany shyǵaryp salý rásimine Aqmola oblysy ákiminiń orynbasary Aına Mysyrálimova qatysyp, oblys ákimniń sálemin jetkizdi.
«Abylaı daryndy han, asa iri qaıratker, qolbasshy boldy. Abylaı han búkil ómirin qazaq halqynyń bostandyǵy, egemendigi úshin arnady. Onyń eńbegi men qaıratkerligin búgin jas urpaqqa jetkizý sharanyń basty maqsaty. Osy baǵytta saparǵa attanǵaly turǵan ekspedıtsııa quramyna belgili ǵalymdar men tarıhshylar, ólketanýshylar, qoǵam qaıratkerleri jáne buqaralyq aqparat quraldarynyń ókilderi kiredi. Olar on kún boıy Abylaı han júrgen «Kókshetaý-Aqmola-Ulytaý-Túrkistan» kerýen jolymen júrip ótip, tarıhı málmetter jınaıdy. Keıin Abylaı men onyń zamany týraly jınalǵan materıaldar ǵylymı maqalalar men jınaqtar retinde jaryq kóredi, sondaı-aq, «Abylaı hannyń qara joly» atty kórkem fılmde túsiriledi», - dedi Aına Mysyrálimova óz sózinde.
Sonymen qatar, oblys ákiminiń orynbasary ekspedıtsııa qorytyndysy boıynsha Aqmola oblysy jáne Kókshetaý qalasynyń tabıǵı jáne toponımdik lanshaftyn qoldana otyryp jınalǵan, elimizde teńdesiz topografııalyq karta qurastyryp, shyǵarý josparda baryn atap ótti.
Shara barysynda jazýshy-dramatýrg, qoǵam qaıratkeri Jabal Erǵalıev pen qoǵam qaıratkeri Murat qajy Ydyrysuly jınalǵandarǵa tarıhı ekspedıtsııanyń mańyzdylyǵy týraly aıtyp berdi. Sonymen qatar, Abylaı hannyń urpaǵy Sansyzbaı Muhıtanov jáne Mádenıet aýylynyń aqsaqaly Dýlat Ámirov sózi alyp, ekspedıtsııa múshlerine aq batasyn berip, aqjoltaı sát-sapar tiledi.