Býrabaıdaǵy «Rixos» qonaq úıiniń 17 qyzmetshisi tamaqtan ýlanyp qaldy

KÓKShETAÝ. QazAqparat - Aqmola oblysyndaǵy «Rixos» qonaq úıiniń 17 qyzmetshisi tamaqtan ýlanyp qaldy, onyń ishinde 7 adam juqpaly aýrýlar ortalyǵyna jatqyzyldy, dep habarlaıdy QazAqparat tilshisi.

«Rixos» qonaq úıiniń qyzmetshileri arasynda bakterııalyq ishek ınfektsııasynyń 17 jaǵdaıy tirkelgeni anyqtaldy. Infektsııany juqtyrǵan 17 naýqastyń 7-i Kókshetaý qalasynyń juqpaly aýrýlar ortalyǵyna jatqyzyldy, qalǵan naýqastar ambýlatorlyq em qabyldaıdy, jaǵdaılary qanaǵattanarlyq», - dedi Aqmola oblystyq sanıtarııalyq-epıdemıologııalyq baqylaý departamenti basshysynyń orynbasary Sáýle Sádýaqasova.

Departament basshysy orynbasarynyń aıtýynsha, qazirgi kezde «Býrabaı» sanıtarııalyq-epıdemıologııalyq baqylaý basqarmasy «Rixos» qonaq úıiniń meıramhanasyna jospardan tys tekserý júrgizip jatyr.

«Sýdyń, tamaq ónimderiniń jáne shaıyndylardyń synamalary alyndy, zerthanada tekserilip jatyr. Sondaı-aq, qyzmetshiler tekserilip, epıdemııaǵa qarsy sharalar jalǵasady», - dep tolyqtyrdy Sáýle Sádýaqasova.

Kókshetaý qalasy juqpaly aýrýlar ortalyǵy mamandarynyń sózinshe, ınfektsııa juqtyryp, aýrýhanaǵa jatqyzylǵan naýqastardyń sany toǵyzǵa jetken.

Aıta ketsek, budan buryn turǵyndary túıneme juqtyrǵan Aqmola oblysyndaǵy aýylda karantın jarııalanǵanyn jazǵan edik.