Býrabaıdaǵy qaraǵaı ınelerinen askorbın qyshqylyn óndirýge bolady

KÓKShETAÝ. QazAqparat – Aqmola oblysy Şýchınsk qalasyndaǵy «Bilim-Innovatsııa» IT lıtseı-ınternatynyń 9-synyp oqýshysy Gaýhar Aman Býrabaı qaraǵaılarynyń ınelerinen askorbın qyshqylyn alý jobasyn oılap tapqan. Bul týraly QazAqparat Oqý-aǵartý mınıstrliginiń baspasóz qyzmetine silteme jasap habarlaıdy.

Gaýhar Aman jetekshisimen birge zertteý júrgizip, qaraǵaı ınelerindegi askorbın qyshqylyn anyqtap, ony adam aǵzasyna jetpeıtin S vıtamınin tolyqtyrý úshin paıdalanýdy usynyp otyr.

«Biz zertteýdi kúz jáne qys mezgilinde qaraǵaı ınelerindegi askorbın qyshqylynyń quramyn anyqtaýdan bastadyq. Şýche-Býrabaı kýrorttyq aımaǵyndaǵy qaraǵaı ınelerindegi S vıtamıniniń maýsymdyq ózgergeristerin taldadyq. Alynǵan dárýmendi oqýshylardyń densaýlyǵyn nyǵaıtý úshin paıdalanýǵa usynymdar berdik», - deıdi joba jetekshisi, geografııa pániniń muǵalimi Áıgerim Esmaqova.

Gaýhar Amannyń aıtýynsha, dárýmen quramy jyl mezgiline saı ózgerýi múmkin, sondaı-aq, askorbın qyshqylynyń mólsheri de túrli temperatýrada ózgeriske ushyraıdy.

«Zertteý nysany – Şýche-Býrabaı ólkesiniń taza aýdandarynda ósetin qarapaıym qaraǵaı ıneleri. Salystyrmaly túrde olardyń quramyndaǵy askorbın qyshqylyn zerttedik. Gıpotezany dáleldeý úshin kúz ben qys mezgilinde qaraǵaı ınelerindegi askorbın qyshqylyn jyly jáne salqyn kezde ıodometrııa ádisimen anyqtadyq», - deıdi oqýshy.

Zertteý nátıjesinde qaraǵaı ınelerindegi S dárýmeni aýa temperatýrasynyń tómendeýi men maýsymdyq ózgergeristerge baılanysty ekeni dáleldendi. Qylqanjapyraqty ósimdik S dárýmenniń balamaly kózi, odan tosap ne qaınatpa ázirlep, tumaý men juqpaly aýrýlardyń aldyn alýǵa bolady.