Býrabaıdaǵy bala ólimi: Lager basshylyǵy qatań jazaǵa tartylady

ASTANA. QazAqparat – Oqý-aǵartý mınıstri Ǵanı Beısembaev Býrabaıdaǵy balalar lagerinde bolǵan balanyń ólimine qatysty túsinik berdi, dep habarlaıdy QazAqparat tilshisi.

«Óte aýyr jaǵdaı. Aldymen, Nurdáýlettiń ata-anasy men jaqyndaryna qaıǵyra kóńil aıtamyn. Bul jaıt boıynsha komıssııa quryldy. Oqıǵanyń mán-jaıy jiti tekseriledi. Máseleni jeke baqylaýymda ustaımyn. Tekseris nátıjesinen keıin lager basshylyǵy qatań jazaǵa tartylady. Óz kezeginde quqyq qorǵaý organdary da tergep-tekserý amalyn júrgizip jatyr», - dedi Ǵanı Beısembaev mınıstrliktiń keńeıtilgen alqa otyrysynan keıin tilshilerdiń saýalyna jaýap bere turyp.

Sondaı-aq, mınıstr oqıǵanyń mán-jaıy anyqtalǵannan keıin habar taratylatynyn aıtty.

Eske salaıyq, Aqmola oblystyq Polıtsııa departamentiniń baspasóz qyzmetinen málim etkendeı, balanyń qazasy týraly 11 qańtar kúni saǵat 6:36-da Býrabaı aýdandyq polıtsııa bólimine jedel járdem stantsııasynyń feldsheri habarlaǵan.

«Anyqtalǵanyndaı, jasóspirim 9 qańtarda Aqtóbe oblysynan Býrabaı aýdanyna balalar tobynyń quramynda kelgen. Qańtardyń 10-ynan 11-ine qaraǵan túni jasóspirim ishi aýyryp turǵanyn aıtqan. Tańerteń saǵat 5:00 shamasynda aýyrsynýdyń kúsheıýine baılanysty keshenniń medıtsınalyq bólimine júginip, jedel járdem shaqyrylǵan. Alaıda, jedel járdem kelgenge deıin bala kóz jumǵan. Alǵashqy tekserý kezinde zorlyq-zombylyqtyń syrtqy belgileri baıqalǵan joq», - degen aqparat tartty vedomstvo.