Býrabaıdaǵy zańsyz jer telimderine qatysty qandaı sheshim qabyldandy — prokýratýra jaýaby
«Jer kodeksiniń 122-babyna jáne «Erekshe qorǵalatyn tabıǵı aýmaqtar týraly» Zańnyń 22-babyna sáıkes, erekshe jaǵdaılardy qospaǵanda (tek Úkimettiń sheshimimen), erekshe qorǵalatyn tabıǵı aýmaqtardyń jerlerin berýge nemese tárkileýge tyıym salynǵan. Tekseris 2000 jyldan 2023 jylǵa deıin Býrabaı aýdanynyń ákimdigi men máslıhaty eldi mekenderdiń shekarasyn keńeıtý týraly sheshim qabyldap, Býrabaı kentiniń, Şýchınsk qalasynyń jáne Býrabaı aýdanynyń jergilikti ákimderi Ulttyq park aýmaǵynan jer telimderin bergenin anyqtady. Zańsyz qabyldanǵan sheshimderdiń kúshi oblys prokýratýrasynyń qadaǵalaý aktileri boıynsha joıyldy, óıtkeni jerdi erekshe qorǵalatyn tabıǵı aýmaqtar qorynan shyǵarý — Úkimettiń aıryqsha quzyreti», — delingen oblystyq prokýratýranyń jaýabynda.
Oblys prokýrorynyń orynbasary Marat Baqtybekulynyń aıtýynsha, qazir ýákiletti memlekettik organdar Ulttyq park shekarasyn naqtylap jatyr.
«Sonymen birge, Ulttyq park qurylǵanǵa deıin (2000 jyl) jáne zańdy túrde berilgen jerlerge, atap aıtqanda qoldanystaǵy jeke turǵyn úıge bólingen jer ýchaskelerine qatysty sharalar qazirgi tańda qabyldanbaıdy. Zańsyz berilgen jerlerdi qaıtarý jumystary Jer resýrstaryn basqarý departamentiniń sotqa talap aryzdary negizinde júrgizilýde. Qazirgi ýaqytta zańsyz berilgen jer telimderiniń kólemi naqtylanýda. Tekseris nátıjesi boıynsha Ulttyq park aýmaǵynan zańsyz jer telimderin bergen adamdarǵa qatysty sharalar qabyldanady», — delingen onyń jaýabynda.
Aıta keteıik, buǵan deıin Aqmola oblystyq prokýrory Rýfat Quttyqov «Býrabaı» MUTP aýmaǵyndaǵy jergilikti halyq burynnan turatyn jer telimderi qaıtaryp alynbaıtynyn habarlaǵan bolatyn.
«Qarapaıym turǵyndar 98-jyldan, 2000-jyldan beri turyp jatqan nysandardy biz súrip tastamaıtynymyzdy, qandaı da bir talap qoımaıtynymyzdy atap ótkim keledi», — degen bolatyn Rýfat Quttyqov.