Býrabaıdaǵy balamasy joq mýltımedııalyq keshenge 7 myńnan astam týrıst kelgen

<p>BÝRABAI. KAZINFORM &mdash; Býrabaıdaǵy Mýltımedııalyq ınteraktıvti keshenge jańǵyrtýdan ótkennen keıingi jarty jylda 7 myńnan astam qonaq keldi. Bul týraly &laquo;Býrabaı Damý&raquo; kásipornynyń baspasóz qyzmeti habarlady.</p>

Bıylǵy shilde aıynda mýltımedııalyq ınteraktıvti keshen aýqymdy jańǵyrtýdan ótip, Qazaqstandaǵy eń joǵary tehnologııalyq mýzeılerdiń birine aınaldy. Ondaǵy zamanaýı anımatsııalyq jáne aýdıovızýaldyq tehnologııalar árbir kelýshige qazaq mádenıetiniń biregeı atmosferasyna enýge jáne elimizdiń tarıhy týraly kóbirek bilýge múmkindik beredi. Zamanaýı keshen kúnine 500 kelýshini qabyldaı alady.

Jańa keshenniń medıakontenti turaqty túrde jańartylyp otyrady jáne oǵan oıyn-saýyq pen tanymdyq materıaldar kiredi. Bul týrısterge túrli baǵdarlamalardan lázzat alyp, jańa ári qyzyqty aqparat alýǵa múmkindik beredi. 

Mýltımedıalyq ınteraktıvti keshen 9 zalǵa bólingen. «Qazaqstanǵa saıahat» bólimi — Býrabaı, Medeý, Shymbulaq, Sharyn kanony, Kaspıı teńizi, Túrkistan, Ústirt ústirti, Muztaý, «Baıqońyr» ǵarysh aılaǵy sekildi elimizdiń týrıstik oryndarynyń baılyǵy men sulýlyǵyn kórsetedi.

«360 kýb» zaly — beıneni keskindeıtin biregeı tehnologııasy bar Qazaqstandaǵy jalǵyz zal. Bes proektor men eki búıirlik ekran 270 gradýstyq panoramalyq keskin jasaıdy, bul kórermenderge ózin fılmniń bir bólshegi sezinýge múmkindik beredi. Atalǵan format perıferııalyq kórýdi qoldaný arqyly jańa sezimder týdyrady jáne barlyq kórinis bóligin kórýge múmkindik beredi.

«Abylaı han» qysqametrajdy kórkem fılminde qazaq halqynyń birtýar perzenti — Abylaı han atanǵan bala Ábilmansurdyń ómir joly baıandalady. Basty róldi qazaqtyń belgili akteri Jandos Aıbasov somdaǵan.

Sonymen birge, keshende kelýshilerdi qyzyqtyratyn birqatar ınteraktıvti ekspozıtsııalar bar — Abylaı hannyń batasyn estip, sadaq atyp jáne kedergilerdi eńserip júrgen batyr sııaqty sezinýge bolady.

Oıyn túrindegi ınteraktıvti ekspozıtsııalar balalar men sheteldik qonaqtarǵa ulttyq mýzykalyq aspaptar, oıý-órnekter, sondaı-aq qazaq dalasynyń janýarlar álemi men ósimdikteri týraly bilýge kómektesedi.

Shejire zalynda eldiń ınteraktıvti kartasynan barlyq qazaq rýlaryn, olardyń tańbasyn jáne turatyn jerlerin biriktiretin sımvoldyq báıterek aǵashy ornalasqan. Mundaǵy maqsat — rýǵa bóliný emes, ár adamnyń shyqqan tegi men tarıhyn bilýge kómektesý.

Aıta keteıik, Mýltımedııalyq ınteraktıvti keshen Abylaı han alańyna qarama-qarsy ornalasqan.

Buǵan deıin Astanadan Býrabaıǵa 2,5 saǵatta jetkizetin poıyz iske qosylǵany belgili boldy.