Býrabaıda jaraqat alǵan jabaıy janýarlardy kútip-baptaıtyn arnaıy zoobaq bar
«Zoobaqtyń tarıhy 1952 jyldan bastalady. Kezinde bul jerde ormanshylar jáne ańshylar úıi bolǵan. Búginde jabaıy janýarlarǵa arnalǵan zoobaq retinde jumys istep tur. Barlyǵy da osy óńirdi mekendeıtin, beıimdelgen janýarlar. Zoobaqqa tap bolǵan janýarlardyń 60-70 paıyzyn ormanshylar men qarapaıym adamdar qutqarǵan. Olardyń negizgi ortasy jabaıy tabıǵat. Ár janýardyń óz tarıhy bar, bireýi jaraqat alǵan, ekinshisin álsiz nemese kishkentaı kezinde taýyp alǵan. Keıde bizge qarapaıym adamdar jaraly aqqý, túlki taýyp aldym dep habarlasyp jatady. Bizdiń mamandar olardy osynda jetkizedi», - dedi «Býrabaı damý» JShS týrızm jáne marketıng bóliminiń jetekshisi Shyńǵys Orazalın.
Onyń aıtýynsha, zoobaqtaǵy janýarlar qaıtadan tabıǵı ortaǵa jiberilmeıdi. Sebebi olardyń jabaıy tabıǵatqa qaıta beıimdelip, ómir súrip ketýi ekitalaı.
«Janýarlar ártúrli. 2018-2019 jyldary bizde arystan da bolǵan. Degenmen soltústiktiń qysy olarǵa qıynǵa soqty, sosyn Almatyǵa jiberdik. Qazir zoobaqta janýarlardyń 20 túri bar. Olardyń qatarynda bızon, elik, Prjevalskıı jylqysy, qasqyr, aıý, túlki, taý eshkisi, búrkit jáne taǵy basqa ań-qustar bar. Janýarlardy kútip-baptaýmen arnaıy qyzmet aınalysady. Mysaly, veterınar mamandar janýarlarǵa vaktsına salyp, chıp taǵady, basqasy olarǵa jemshóp, azyǵyn beredi. Sol sııaqty ań-qustardyń mekendeıtin toryn tazalaý jumysy júredi», - deıdi ol.
Sondaı-aq, spıker janýarlardy kútip-baptaý men olardy azyqpen qamtý aýqymdy jumys ekenin aıtyp ótti.
«Aıtalyq, ár janýardyń ózine tán azyǵy bar jáne janýarlardy qorektendirý ýaqyty ártúrli. Bizdiń mamandardyń jumysy tańǵy saǵat 6-dan bastalady. Taǵy bir jaıt, qysqgúni keıbir qustarǵa qıynǵa soǵady. Sebebi olar jyly jaqty mekendeıtin qustar. Tájirıbe almasý jáne ózara qoldaý maqsatynda Almaty jáne Qaraǵandydaǵy zoobaqpen únemi baılanystamyz», - dedi Sh. Orazalın.
Aıta ketsek, atalǵan zoobaqtaǵy janýarlardy Býrabaıǵa barǵan týrıster men demalýshylar tamashalaı alady. Kirý aqyly.